Russian president Vladimir Putin chu global summit Beijing-a neihnaah red carpet pharha lawma awmin China leh Russia te chuan an inzawmna nasa zawkin an sawhnghet mek bawk.
Putin chu ram hrang hrang 130 chuang hruaitu lawkte kalkhawmnaah guest of honour nih tir a ni a.
Nikum February thlaa an ramin Ukraine a run hnu atangin an ram a chhuahsan lo tluk a ni a.
Khawvel ram hrang hrang tena an kawmserh mai bakah Ukraine-ah war crime tia puhin International Criminal Court (ICC) chuan amah manna thuchhuah a siam mek lai a ni bawk.
Putin hi China-ah erawh man a nih a rinawm loh thung a, Beijing chu ICC-a tel ve ram a nih loh vang a ni a. Putin leh XI hi inkawmngeih tak ni bawkin Chinese leader Xi phei chuan an inthianna chuan ‘chin lem a nei lo’ tiin a lo sawi hial tawh a ni.
Beijing-a Great Hall of the People-ah opening ceremony pui tak neih a ni a. Xi leh Putin te chu lut rualin ram dang hruaitute lakah pawh an langsar dun hle bawk a.
Putin chu thlalak hona neihah pawh Chinese president bulah zel awm bawkin Xi thusawi hnu chiaha thusawi zel a ni bawk a, a hnuah darkar thum lai inkawm dunna an nei dun bawk.
Vladimir Putin chuan XI-a hmalakna BRI project chu a thlawp thu sawiin Russian ideas nena inmil tia sawiin an hlawhtlinnaah ‘Chinese thiante’ chu a lawmpui thu a sawi bawk.
BRI hmang hian China chuan khawvel ram hrang hrangah investment follar billion tel tehmeuh a kalpui a.
Tun summit neihnaah hian developing ram Global South te an tam ber a. Tun tum summit ah hian Khawthlang ram te chuan China leh Russia te chuan Khawthlang ram bloc te el tur bloc thar siam tumin hma an lakna tiin an sawi bawk.
China leh Russia te chuan Us kaihhruai ‘global hegemony’ chu an hnawl thu sawiin chu aiah chuan centres of power tamna ‘multipolar’ world an duh thu an sawi bawk a.
Thusawina a neihah pawh Xi chuan BRI chu ‘hma lam thlir lawkna leh kal dan tur dik tak’ tia sawiin history pawh kan lama tang a ni tiin a sawi bawk a.
Ideology inan loh avanga inmihranna te, geopolitics avanga inhmelmakna te, bloc politics te bakah hrekna kalpui fo leh supply chain tihbahlah reng te chu Washington policy tia sawiin globalisation khawvelah a rem lo tiin Beijing chuan a sawisel a ni.
BRI chu ‘win-win cooperation’ tia sawiin a meichher chu thing dah belh ang zela sang zel tiin a sawi thung.
Xi chuan BRI chu hma lam a pan zel theih nan eigth-point plan tlangzarh bawkin chutah chuan project te nau zawk ‘green development’ leh ‘integrity building’ te chu kalpui a nih tur thu a sawi bawk.
BRI hi ram tam takah hmasawnna siamtu tia fak a nih rualin leiba tam tak neia ram thang mekte siamtu tia sawisel a ni tho bawk a. Chumai bakah environment ti chhiaa eirukna tihluar leh project hlamzuih zui tam tak siam tu an ti tho bawk.
Beijing summit-ah hian Africa ram an tam hle a, chu bakah South East Asia leh South America ram te pawh an tel a. A tel ve ram hruaitu zingah Hungarian Prime Minister Viktor Orban bakah Afghanistan Taliban sorkar pawh an tel a ni.
Putin leh Xi ten lungrualna tilang
