Daily Newspaper

PV Sindhu-in Bronze Medal hlawhchhuak

8

Tokyo Olympics ah India chhuanvawr PV Sindhu chuan He Bingjiao hnehin Bronze Medal a hlawhchhuak a. India hmeichhe zingah Olympic medal pahnih la thei hmasa ber a ni a, record thar duhawm tak a siam.

Badminton player PV Sindhu hian semi-final-ah World No. 1 Tai Tzu Ying a hmachhawn a, set lak nei lovin a tlawm a; a zawna Olympic final khelh a tumna a puitlin zo lo. Tai Tzu Ying hneh lo mahse Bronze Medal inchuhnaah tha zetin a inlan a, a khingpui He Bingjiao chu 21-13, 21-15 a sawpin hnehna pawimawh tak a chang a. India hmeichhe zingah Olympic-ah a zawna medal hlawhchhuak thei hmasa ber a ni ta a ni.

Tokyo Olympic-a Bronze medal la PV Sindhu hian Rio Olympics 2016-ah khan final a lut a, final-ah World No. 1 Carolina Marin lakah tlawmin Gold Medal a hlawhchhuak zo lo. Olympic-a Badminton inelna bikah hian a zawna medal hlawhchhuak thei an tam lo hle a, PV Sindhu hi palina chiah niin a hmaah hian Susi Susanti (gold -1992, bronze -1996), Bang Soo-Hyun (silver -1992, gold -1996) leh Zhang (gold – 2004, Gold – 2008) ten a zawnin medal an lo hlawhchhuak zawn tawh a. Hnuhma nei tha zingah Indian shuttler PV Sindhu hi a tel thar ve ta chiah a ni.

Tokyo Olympics neih mekah India tan medal pathum a hmin ta chiah a. Manipur nula Mirabai Chanu chu medal hlawhchhuak hmasa ber niin, rit chawiah silver medal a hlawhchhuah a. PV Sindhu bakah hian Boxer Lovlina Borgohain chuan medal a hlawhchhuak ngei dawn tih a chiang tawh bawk. Rio Olympic-ah khan India in medal pahnih a hlawhchhuak a. Tokyo Olympic-ah hian hmeichhe pathumin medal an hlawhchhuak tawh a. Olympic neih tawh zawng zawnga India hmeichhia pathumin medal an hmasak ber tum a ni a, India tan Olympic chhinchhiahtlak tak a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy