Daily Newspaper

PYD-in vantlang tan hna tha thawk

29

October 2 kha UPC North East India thalai pawl – Pentecostal Youth Department Social Work Day a ni a, India hmarchhak pum huapa hman a ni a. Kumin hian kum dang anga hman theih ni lo mah se, sawrkar dan siam leh hrileng darh lohna tura inveng chungin a theih ang anga vantlang tana hman a ni.

Social Work Day hmanna pui ber, Aizawlah chuan Aizawl City PYD Coordination Committee huaihawtin September 28 atanga October 1 inkarah Blood Donation Week buatsaih a ni a. Aizawl khawpui chhunga Pastor bial 17-ten a vaiin thisen unit 313 Aizawl Civil Hospital tan an pe. Zirtawpni khan bial leh tualchhung thenkhat chuan vantlang hmun pawimawh tihfai leh damdawi in tana thilpek pek nan hun an hman chhunzawm a, VLTF leh mi harsate tana tanpuina pea luangchhuak bial thahnem tak an awm.

Lungleiah pawh Social Work Day hmangtu, Town Area PYD chuan September 29 zingkar khan Sazaikawn bula PYD-ten zun in an siam chu a bul vel an samfai bakah cheitha in rawng an hnawih thar a; Town Area PYD hian Bethel Centre Vanhne-ah thilpek an hlan bawk. Haulawng Bial PYD pawhin he ni pual hian September 29 khan Lunglei Civil Hospital tan thisen unit 91 an pe a ni.

Siaha-ah chuan PYD-ten Blood Donation Camp an buatsaih a. Kolasib, Serchhip, Thenzawl, Aibawk leh hmun dangah pawh a theih ang angin vantlang hmunhma tihfai leh cheithat hna an thawk. Thingtlang lam bial tam zawk chuan khawchhung thenfai, thlanmual samfai, vantlang hmunhma cheithat leh tihfai hna an thawk bawk. Mizoram state pawn leh Mission Field-a PYD te pawhin theih ang angin vantlang tan hna an thawk a ni.

General PYD president Pastor H. Lalropuia chuan he ni hmangtu India hmarchhak huamchhunga PYD member zawng zawngte hnenah lawmthu a sawi a, khua leh tui tana mi tangkai leh chhenfakawm ni zel turin a ngen tih a sawi a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy