December 18 chhuna Mamit district West Phulpui ram chhunga lung lakna quarry chimin a chim hnan hnamdang pathum ruang chu lakchhuah hleihtheih loh khawpin a la harsa a, ruang pakhat hi he chanchin buatsaih lai hian lakchhuah theih mai tura ngaih niin, midang pahnih phei chu an awmna pawh an la hre lo nia sawi a ni.
District Disaster Management Authority Mamit chu an chairman, bawrhsap VL Remliana hoin West Phulpui bula quarry chim chungchanga hmalak dan tur ngaihtuahin Ningani khan an thukhawm a. Ruang chu a chak thei ang bera khawl leh mihring tha hmangin lakchhuah tuma hma lak nise, an ti a. Quarry chimnaah hian a hmunah excavator tirh a nih bakah Mamit atang ruang lak chhuahna buaipui tur hian State Disaster Response Force team tirh nghal an ni. A hmuna kal PWD executive engineer report leh hmalak dan tur rawtna ngaihthlaka sawi ho zui niin, Krismas hma ngeia kawng tlang hman hram tura hma lak tum a ni.
West Phaileng SDO (Civil) chu incident commander ah leh SDPO W. Phaileng chu deputy incident commander-a dah an ni.
Tarlan tawh angin, W. Phaileng leh Marpara inkar kawngpui siamtu SLT Infracon Pvt Ltd. in quarry atana an hman Zathanga quarry chu Nilaini khan chimin excavator khalhtu mi pahnih bakah labour pakhat a chim hnan a ni.
Quarry chim hnan ruang lakchhuah tumin bei mek
