French Open 2020 chu tluang takin khelh chhunzawm zel a ni a, a hmawrbawk a hnai sawt ta hle. Petra Kvitova chuan kum 2012 hnu lama a vawikhat nan French Open quarter final a lut.
Hmeichhe lama rinkaite an tlak phuk phuk laiin Kvitova erawh a la khel tha tluang hle reng thung a, fourth round a khelh zawh thlengin set hloh a la nei lo. Kum 31 mi Kvitova hian fourth round-ah China nula Zhang Shuai a hma-chhawn a, harsatna lian tawk lovin hnehna a chang. Set khatnaah a khingpui a chungtlak hneh viau a, game hnih chiah hlohin set a la. Set hnihnaah an inkhel tawk hret a, game li hloh chungin hnehna a chang hram thung a, 6-2, 6-4 a chakin quarter final a lut.
Kvitova hian kum 2012 khan a vawikhat nan French Open quarter final a lut a, semi final-ah a tlawm thung. Kum riat zet hnuah a vawikhat nan quarter final a lut leh nawlh a, semi final lut turin German Laura Siegemund a hmachhawn leh zet ang. Kvitova hmaa ding tur Laura Siegemund hian fourth round-a a khingpui Paula Badosa chu 7-5 6-2 in a hneh.
(THE AIZAWL POST – Infiamna)
Full>> ePaper Subscribe
