Daily Newspaper

Question Hour leh Private members’ business hnawl

30

Lok Sabha chuan tun tum Monsoon Session-ah Question Hour leh private member’s business te kalpui loh an remti a.

Sorkar thutlukna siam hi opposition te Congress te kaihhruai chuan an sawisel nasa hle a. Question Hour chu ‘golden hour of the House’ tiin an sawi.

Lok Sabha-a Congress leader Adhir Ranjan Chowdhury chuan Parliamentary Affairs Minister Pralhad Joshi chu na taka sawiselin Question Hour chu parliamentary democracy lairil leh executive te chu mawhphurhna la leh chhanna pe thei Question Hour-ah an ni tur a ni, a ti a. Tun ang hun danglamah House ber kan thukhawm a nih chuan ‘Eng vangin nge Question Hour bik chu hnawl a nih?’ tiin zawhna a siam.

“Mipuite tana zawhna kan siam theih hun a ni a. Question Hour hi House a golden hour a ni,” tia sawi bawkin, hnawl a ni chuan sorkarin Indpendence hnua kalpui democratic practice rahbeh a tumna a ni tiin a sawi bawk.

Parliamentary Affairs Minister Pralhad Joshi chuan Lok Sabha chu Covid-19 avanga hun danglamah neih a nih avangin house chuan starred question leh private members’ business te tun session-ah a kalpui lovang tih motion a pulut a ni.

AIMIM chief Asaduddin Owaisi chuan Question Hour leh private members’ business te chu democracy lungphum niin parliamentary democracy awm nana tihmakmawh tiin a sawi a. “Speaker hian executive tena legislature territory palzut an tumna hi remti lo turin ka ngen a ni. Ni zahthlak tak a ni,” tiin a sawi.

TMC MP Kalyan Banerjee chuan Question Hour chu parliamentary procedure basic structure tia sawiin ‘Kan tihchhiat a rem lo’ tia sawiin, “Ka ngaihdan pholan pawh kan duh” a ti bawk a. “He kan chanvo hi min laksak suh u. A mawina a bo ang, a mawina 50% in la bo ang,” tiin a sawi bawk.

Joshi chuan thutlukna siam a nih hmain Lok Sabha deputy leader leh Defence Minister Rajnath Singh chuan party hrang hrang hruaitute a biak rawn thu a sawi a.

“Question Hour hnawl duh lo hruaitute ka zawh duh chu state assembly tin Punjab, West Bengal, Rajasthan, Andhra Pradesh leh Kerala telin ni hnih chauh session neiin bill tam tak an passed a. India sorkar chuan ni 18 session neiin bill sawihona kalpui ni se a ti zawk a ni,” tiin Joshi chuan a sawi thung.

Tun hnai kum nga chhungin Rajya Sabha-a Question Hour 60% leh Lok Sabha-ah 40% tul lova khawhral a ni a. Sorkar hi sawihona nei kher lova zawhna zawh dan kawng tam tak a awm a ‘In zawhna tin te kan chhang vek ang che u’ tiin a sawi bawk.

Defence Minister chuan he mi chungchang hi hruaitu thahnem tak a sawipui thu sawiin hun danglam a ni a ‘In thlawpna kan mamawh vek a ni’ tia sawiin House hi darkar li zel chauh neih a ni dawn a ‘Tu pawhin zawhna a neih chuan Zero Hour laiin a ti thei tho’ tiin a sawi bawk.

Rajnath Singh chuan hruaitu a biak te tam ber chuan Question Hour nuaibo rih chu an thlawp thu sawiin, “Member tin te min thlawp turin ka ngen che u a. In ngaih pawimawh chu unstarred questions hmangin in zawt thei tho ang a, minister-in a chhang ang. Chuta member an la lungawi lo a nih chuan Zero Hour-in sawifiahna in phut thei ang” tiin a sawi bawk.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy