Raducanu kang zel mah se
Sabalenka la ngam rih lo!
Tleirawl qualifier mai ni chunga 2021 US Open title hawn thei Emma Raducanu chuan New York Grand Slam tournament inbuatsaihna hnuhnung Cincinnati Open-ah world number one Aryna Sabalenka hneh zo ta lo mah se major title a beisei leh mekna kawngah Briton hian hma a sawn tih loh rual a ni lo a, Belarusian nen pawh an insualtawk hle tawh a ni!
Defending champion Sabalenka hi Wimbledon khelh zawh taka a tlak hnu khan chawlh hmangin a tawmbo daih a, tun hi London grasscourt major hnu lama tournament a hmachhawn leh vawi khatna niin, Thawhtanni marathon third-round match-ah British number one nen an inbeitawk hle a, darkar thum chuang hnuah 7-6 (7-3) 4-6 7-6 (7-5) hnehna changin fourth round a lut hram a ni.
Flushing Mewdows-a a rawn champion nawlh hnua hliamin a tihbuai chhunzawm tak reng Raducanu hian kuminah hliam thawhsanin hma a rawn sawn chho khawp mai a, tun season-ah hian WTA ranking lamah pawh world top 40 huang a rawn luah chho leh ta a; Cincinnati Open third round match pakhatah pawh khan tunlai hmeichhe tennis-a player khawng ber pawl Sabalenka tan pawh dehkhirh tak a ni chho leh ta!
Kumin Wimbledon third round-ah bawk pawh khan British number one hian Sabalenka kha a chai thei viau tawh a, la hneh zo chiah lo mah se na takin a nawr a, Belarusian khan nuamsain hnehna a chang bik lo a, Cincinnati lamah pawh set khat hloh chungin a chak hram a ni.
Sabalenka chuan Raducanu fitness rawn tha chho mek chungchang sawi lehin, “Wimbledon-a ka rawi tawh ang khan rilru leh taksa lama a hriselna rawn pangngai chho leh ta hian min tihlim takzet a ni.
“Match tinah hma a sawn zel tih a hmuh theih a, amaha tha ber kha a rawn neikir leh ta tih ka hmu thei.
“Ani nena inbeih hi nuam ka ti a, player ropui a ni ngei mai,” tiin a fak.
Raducanu hi US Open khelh chhoh turah hian seeded player 32 zinga a tel chhoh rin a ni a, he hard-court Grand Slam-ah hian draw duhawm zawk a nghah chhuah a rinawm.
Tarlan tawh thin angin, Briton Raducanu hian tunhnai mai khan Rafael Nadal kuta major title 22 luhpuitu coach zinga pakhat Francisco Roig kha coach-ah a ruai thar a, Cincinnati-a third round a thlenpui hnuah Spaniard kum 57 hnuaiah beiseina a nei sang zel dawn niin a lang.
Hetia kan sawi mek lai hian top 10 player laka Raducanu record a chhiat belh zel a, Sabalenka a hneh loh nen chhiar telin top 10 player a hmachhawn hnuhnung 17-ah vawi thum chiah a la chak a, New York-ah hian a hmasawnna tak tak chu a pholan a ngai ang!
Tunhnai hian Ohio state lam a lum nuam hle a, kum 22 mi Raducanu leh Sabalenka inkhelh laia court chhung boruak pawh kha 32C a ni pha hial a; kum 27-a upa Belarusian pawhin chawlh laiin a chhip tidai turin vura chiah inhrukpuan a chhipchhuan hial nghe nghe!
Sabalenka hian last 16 inkhel pakhatah Spaniard Jessica Bouzas Maneiro a hmachhawn leh ang.
Cincinnati Open champion hlui sixth seed Madison Keys pawh last 16 lut zingah telin, Japanese Aoi Ito lakah minute 20 lek chhungin 6-4 6-0 hnehna a chang.
Russian nula chhe lo Anna Kalinskaya chuan American fifth seed leh Wimbledon runner-up Amanda Anisimova lakah rin loh takin 7-5 6-4 hnehna a chang nawlh a, season kal laia top 10 player pathum a hnehna ni tawhin, next round-ah a chipui Russian Ekaterina Alexandrova a hmachhawn leh dawn a ni.
Raducanu kang zel mah se Sabalenka la ngam rih lo!
