Daily Newspaper

Rafale Fighter Jet

9

Indian Air Force thuam chak nana an lei thar France siam Rafale fighter jet hi khawvela indona atana hman chi thlawhtheihna-ah chuan a advance ber pawl a ni a, he fighter jet hian India boruak lam sipai te pawh a thlamuan hle a ni. Rafale fighter jet hi French fighter jet siamtu hriathlawh tak Dassault Aviation kutchhuak a ni.

A man hi sawi hmasa ber teh ang. Rafale fighter jet hi engmah fit belh lohin, ama nihna ang ngau ngauin mi pakhat chuan theihna chu Euro maktaduai 91 man a ni a, mi pahnih chuan theihna chu Euro maktaduai 94 man a ni. Hengtiang fighter jet hi India-in Dassault hnen atang hian 36 a lei dawn a, a sum sen tur chu Euro tluklehdingawn 7.878 a ni! Euro 1 leh Rs 88 vel a intluk a, a man chu lo chhut ve mai teh u.

Rafale fighter jet hian M88-2 engine pahnih neiin, a engine hi 16,850 pound-force of thrust (7.5 tonnes) ve ve pechhuak thei a ni a, a thlawk chak vet vet hle a, a top speed chu Mach 1.8 a ni a, chu chu 2,222 kmph vel a ni! Chu chu ri kal chak zawng (speed of sound) aiin a let 1.8-in a thlawk chak zawk tihna a ni.

Tonne 24.5 (ton khat chu kg sang khat) a rit a thlawh chhuah pui thei a, a tui (fuel) pawh tonne 11.4 a pai thei a, tui thun belh lovin km 3,700 a thui a thlawk thei. |um nan hmun meter 450 tlan kawng a mamamawh a, a thla hmawr ve ve a tehin meter 10.9 niin, meter 15.3 a sei a ni a, engmah phur lovin tonne 10 a rit niin, tonne 24.5 a rit a thlawhchhuahpui thei a, feet 50,000 a sangah a thlawk thei bawk.

Rafale chak dan hi kan hriatthiam theih nan khawvela production car chak ber pawl Bugatti Chiron nen khaikhin chhin teh ang. Bugatti Chiron hian 8-litre W16 engine a nei a, chu chu V8 pahnih belhbawm ang a ni a, 1479 bhp @ 6700 rpm leh 1,600 Nm torque @ 2,000-6,000 rpm pechhuak thei a ni a, a top speed chu 420 kmph a ni a, chu chu Rafale fighter jet top speed hmun nga a thena hmun khat ang vel a ni.

Rafale hi ralthuam changkang leh hlauhawm taka thuam, indona chi hrang hrang atana tangkai tura thuam a ni a, air defence bakah hmelma te ram chhunga rûn nana tha fahran mai niin, electronic warfare leh ground support a nei a, ralthuam paina tur hmun 14 a nei bawk a ni.
A ralthuam pai zingaah Meteor air-to-air missile hi a pawimawh hle a, BVRAAM (Beyond Visual Range Air-to-Air Missile) unit niin, hei hian km 100 dana thil awm a kap fuh chat chat thei a, Mach 4 a chakin a missile hi a thlawk thei a, India boruak thlawh pel kher lo pawhin hmun hla taka hmelma thlawhtheihna a kap thla chat chat thei dawn a ni. A missile hian km 120 bial chhungah chuan a tum hlah lo tura ngaih a ni a, tunlai khawvela missile changkang ber pawl a ni.

Hei bakah hian SCALP long-range cruise missile neiin, km 600 a hla a kap pha a, hei hi boruak a thil awm kah nan a hman theih bakah leia thilawm kah nan a hman theih a, he missile hi cheng vaibelchhe 40 man a ni hem mai. Chumai a la ni lo French kutchhuak HAMMER (Highly Agile Manoeuvrable Munition Extended Range) a nei bawk a, precision-guided air-to-ground missile system neiin, hei hi guidance kit leh range extender kit a thuam belh theih a ni a, lei hnuaia sipai tawm buk (bunker) te pawh phin darh thei tur a ni. Heng bakah hian MICA air-to-air missile leh twin gun-pods 30 mm cannon a la nei tel cheu bawk a ni.

Rafale fighter jet hi RBE2 a thuam niin, hei hi radar chak tak a ni a, tum khatah amah rawn beitu chi hrang hrang lo chhui nghal zung zung thei a ni a, ‘front sector optronics’ (FSO) system neiin, hemi hmang hian hmelma radar tana hmuh theih loh deuhthaw te pawhin a awm thei a, chubakah hmelma thlawhtheihna radar te hnathawk thei loin a siam thei bawk. Spectra electronic warfare suite a thuam niin long rage, electro-magnetic leh laser hmanga hmelma ten an beih theih loh nan a tangkai hle bawk a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy