Rahbi Thar Mizo Baller Tan
Mumbai khawpui lama hmunpui nei Bharat Sports Evolution leh Mizoram basketball-a hming lian pahnih Lalrina Renhlei leh Matthew Sailo hmalaknain karliamta January ni 8-11 chhung khan khawvel hmun hrang hranga basketball khelh dan hlawkthlak leh thuk zawk hmanga training pe thin, American tlangval, kum 26 mi Coleman Ayers leh a team-te chuan Mumbai leh Pune lama hun an hman hnuin Mizo basketballer-te tan training pein, he hunah hian coach leh player mi 25 an fuankhawm. He hun hi Folkland Park-ah neih a ni.
Training neihna hmun Folkland Park-ah hian Mizo mai bakah North East mi leh sate’n he hun hi an chhim.
“Mizo tan awmze nei lehzual zawkin he game hi a khelh theih a, MSL aia thui an thlen theihna turin theihna an nei,” tiin trainer Coleman Ayers hian a sawi.
“Position hrang hrangah talent peipun tlak Mizo ka hmu a, guard tha bikte pawh an awm – guard tha tak national team-a inlan thei an awm a, thawhrim piah lamah awmze nei zawka coaching tha dawng thei turin inzir peih a ngai a. India hmarchhak kila Lalrina Renthleite ang talent nei tha chungchuang an awm hi a mak zawk hial!” tih thu a sawi bawk.
Bharat Sports Evolution lama co-founder Pi Kajol chuan, “Basketball hi India rama thalai, he game tuichilhte’n hma an sawn theihna turin trainer cum coach tha zawk chahluh zel kan tum. Kumin nipui (summer) lo awm turah hian naupang a duh leh remchang tan USA emaw Spain-ah emaw training an chhim theihna tur hun tha buatsaih kan tum,” tiin Mizo naupangte tana chanchin lawmawm a sawichhuak.
Mizoram Super League 9 khelh zawh taka MVP R. Lalnunpuia chuan, “A hlawkthlak takzet a, thil thar kan zir belh a, hun rei zawk ni thei se duhthusam,” tiin American val hnuaia training chungchang hi a sawi.
He hun tha bik hi registration fee Rs. 4,500 pein a chhim theih a. India ram hmun pathum chauha buatsaih a ni leh, Aizawlin kan lo thlen theihna’na hma latute an fakawm hle. MSL piah hi kan kai a hun ta viau a, chumi tur chuan training tha khawvel pumhuap pawha hriat hlawh Miami tlangval hnuaia inchherhriamte hi an nihlawh hle.
He game-a lut thuk tawh Mizo tan Mizoram pela invawrhsan zel hi kawng zawh zui tur awmchhun a ni ta.
Hma lam pan turin thawhhona tha a ngai a, chumi a thlen theihna tur chuan MBBA hnuaia referee lam pawhin tan an la thar nasa a, game an kaihhruai danah pawh nasa takin Mrivs lam hi an danglamna tha hmuh theihin a awm.
Association lamin tha thlah miah lovin tournament a buatsaih kumtluan a, tualchhunga tawp mai lovin kawng sial thar a ngai thui tak zet ta!
Mizo baller-te tan Mizoram pawn thlen a hun chho ta – hei hi kan inenna tur leh tehna tur awmchhun a ni.
Rahbi Thar Mizo Baller Tan – Tpa Bunghai
