Daily Newspaper

Rahul-an Amit Shah bang ngei turin phut

40

Home Minister Amit Shah chu a bang tur a ni a, Supreme Court chuan Pegasus software an hman avangin Supreme Court-in judicial inquiry a kalpui tur a ni. tiin Congress president hlui Rahul Gandhi chuan a sawi.

Parliament complex pawna media mite a kawmnaah Gandhi chuan amah chu thlurbing zingah a tel loh thu sawiin ‘mahse a phone te chu ngaihthlak ruk ngei a ni ang’ tiin a sawi bawk.

“Intelligence Bureau te hnen atangin phone call ka dawng a, heng mite hi phone ngaithlarutute chu an ni. Min rawn bia a, ka phone an ngaihthlak ruk thu min hrilh” tiin a sawi.

Rahul Gandhi chuan Narendra Modi hlau chu rukru leh eiuk hmangte bak an ni lo ang tiin a sawi bawk.

“Pegasus hi Israeli sorkar chuan ralthuama a ngaih a ni a, he ralthuam hi firfiakte laka hman tura tih a ni. Prime Minister leh Home Minister-te hian he ralthuam hi Indian State lakah an hmang a ni” tiin a sawi bawk.

“Politics a hlawk nan an hmang a, Karnataka-ah an hmang a, midang chhui nan an hmang a, Supreme Court lakah an hmang a, institution tin te lakah an hmang a ni. |awngkam danga sawi theih dan awm chhun chu ram phatsanna a ni. |awngkam dang reng a awm lo va, Home Minister hi a bang tur a ni” tiin Congress leader chuan a sawi bawk.

A phone ngaihthlak ruk chungchangah a mimal zalenna tihbawrhban a nih piah lamah sorkar sawiseltu reng rengte beihna tiin a sawi bawk.

Sorkar hian Pegasus spyware hi Supreme Court mai bakah Central Bureau of Investigation (CBI) Director hlui Alok Verma lakah pawh an hmang a, khatih lai kha Rafale deal chhui lai vel a ni tiin a sawi bawk.

“Ka sawi fo tawh angin Rafale leiah khan rukrukna lian tak a awm a ni. Tute mahin min thlawp duh lo va. Mahse, thudik chu a lo lang chhuak ta a ni. France-ah inquiry tih a ni mek a, he Rafale eirukna thilah hian Prime Minister hi mawhphurtu a ni” tiin a sawi bawk.

“Zawhna pawimawh ber mai chu – Eng vangin nge CBI Director-in FIR a thehluh dawn ruaiah engvanga a phone ngaihthlak ruk a nih a, eng vanga blackmail tawk nge a nih? Tu tih nge? Chu chu zawhna pawimawh ber a ni” tiin Gandhi chuan a sawi bawk.

Senior Congress leader P. Chidambaram pawhin Pegasus chungchanga India-in a hmachhawn dan chu France leh Israel-te chetdan nen a khaikhin bawk a. Heng ramte hi chuan puhna te enfiah nghalin hma an la a, India erawhin sawihona neih pawh a duh lo tiin a sawi bawk.

Congress-te chuan Pegasus chungchangah Ningani khan lungawi lohna lantir tawhin Supreme Court kaihhruaia chhuichian an phut thu an lo sawi tawh bawk a. Hei bakah hian Home Minister Amit Shah chu bang ngei turin an phut bawk.

Sorkar leh rorel lai BJP-te chuan Pegasus project chungchang chu phuahchawp tia sawiin engmah finfiahna awm lo an ti bawk.

Chidambaram chuan, “France chuan Pegasus chungchangah investigation nei nghalin National Security Council meeting a ko nghal a. Israel pawhin enfiah nawnna nei turin hma a la zui bawk a. India ve chuan engmah inenthlakna a awm lo tiin sawihona neih pawh a duh lo va” tiin Union Minister hlui chuan a sawi bawk.

Pathianni kalta khan international media consorium-te chuan India mi 300 bawr vel an zingah minister pahnih, journlaist 40 chuang, opposition leader pathum leh judge nilai mek pakhat bakah sumdawng thahnem tak leh activist-te chu Pegasus hmangin an phone hack niin an tarlang a ni.

He report hi The Wire chuan international publication hrang hrang Washington Post, The Guardian leh Le Monde-te pawh telin Paris-a inbun media non-profit organisation Forbidden Stories leh rights group Amnesty international-te investigation kalpui a ni.

Israeli surveillance company NSO Group-te siam Pegasus software hmang hian khawvel pumah mi 50,000 chuang phone hack niin heng mite list hi media intelkhawmte chuan an tlangzarh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy