Congress leader Rahul Gandhi chuan miretheite tana Rajasthan sorkarin healthcare programme a siam chu fakin kum 2024 Lok Sabha poll-ah Centre-a Congress-in sorkarna a chang a nih chuan ram pum huapa hman turin kalpui a ni ang tiin a sawi.
Gandhi chuan healthcare lama inthlauhna sang lutuk chu sawi langin sum neite chauhin hospital lian leh thaa enkawlna tha an dawng thei a, sum nei ve lote chuan cancer emaw lung lam natnaah te harsatna namen lo an tawk a ni, a ti bawk a.
Congress leader chuan medical tragedy a awmin a tuartu ber te chu mirethei an ni zi tiin hei vang hian national level ah healthcare ennawn leh vek a ngai a ti bawk a.
“India ramah ka zinkual nasa a, ka hmuh chhuah chu medical tragedy tuartute chu mirethei an ni zel. Pawisa i neih chuan damdawi In thaah enkawlna tha i dawng thei,” tiin Wayanad MP chuan a sawi a.
“Pawisa i neih chuan damdawi in thaah a inenkawl theih a, mahse sum nei ve lo tena cancer emaw heart disease emaw an neih chuan thih mai bak hmabak a awm lo,” tiin Congress chief hlui chuan a sawi a.
“National level ang pawhin healthcare hi kan ngaihtuah a ngai a, national government hian thutiama a neih tur chu mipui te tan healthcare man tlawm bawk si abik takin mirethei te tan a pe tur a ni,” a ti a.
“Rajasthan-ah hma kan la tawh a, kum 2024-a sorkarna kan chang a nih chuan heng kan ruahmannate hi ram pum huapin kan kalpui ang,” tiin Gandhi chuan a sawi bawk a.
Hei bakah hian private damdawi in te hlawkna chauh uma an intlansiak chu tha lo a tih thu sawiin ram tana thil tha a ni lo a ti bawk.
Congress-te hian Rajasthan-ah Chiranjeevi Health Insurance Scheme an kalpui a, medical coverage Rs 50 lakh ah dahin chu chu mirethei leh middle class family ten an hlawkpui dawn an ti a ni.
Rahul-a’n Rajasthan healthcare fak
![](https://theaizawlpost.org/wp-content/uploads/Untitled-358.jpg)