Rahul man vangin MPCC pungkhawm
New Delhi-a zirlaite punkhawm kaihhnawihah Congress hruaitu, Lok Sabha leader of opposition Rahul Gandhi chu Thawhlehni khan Delhi Police-in hruaitu dang thenkhat nen an hreng a, hemi duhlohna avang hian Mizoram Pradesh Congress Committee chuan Mizoram larsap hnenah memorandum thehlutin Thawhlehni zan khan Lok Bhavan kawtah an pungkhawm.
MPCC thuchhuak chuan, July 21 khan Delhi-a zirlaite leh police innawrna nasa tak kara zirlai thlawpa kal Rahul Gandhi kutthlaka man a nih thu sawiin, hemi duhlohna lantirin Lok Bhavan luhna bulah an pungkhawm tih a sawi a. Larsap hnenah MPCC hotuten memorandum thehlutin, zirlaite thlavang hauhna chu kalpui zel an tum tih an sawi.
Punkhawmnaah MPCC senior vice president Lalnunmawia Chuaungo chuan, AICC president Pu Mallikhargun Kharge leh leader of Opposition Rahul Gandhi te chuan zirlaite thlavang hauhin an nawr a. India rama zirlaite hmakhua an ngaih avangin India rama state zawng zawngah July 21 zan hian Raj Bhavan kawtah an pungkhawm a, Prime minister Narendra Modi hnenah larsap kaltlangin memorandum an thehlut tih a sawi.
AICC-a an hotuten sawrkar laipui an nawr mekna an thlawp a. Zirlaiten dan hnuaia an chanvo humhim zo lo leh chuti zawnga hma la duhlo sawrkar laipui chu an dem a, hemi atana mawhphurhna la hmasa ber tur Union Education minister Dharmendra Pradhan chu bang turin an ngen tih a sawi a ni.
“Thil dik lo leh fello nasa tak a awm chung pawha central sawrkarin a tih tur a tihloh hi Parliament-ah sawiho ngei turin kan phut a ni,” a ti bawk.
Sawrkar laipuiin hma a la zui lo a nih chuan thalai leh zirlaite hmakhua ngaiin, an chanvo humhim sak an nih theihnan Congress party chuan hma an la zui zel dawn a, Indian National Congress chu zirlaite, thalaite tan an ding zel dawn tih MPCC hruaitu hian a sawi a ni.
He hunah hian AICC in- charge Mizoram Mathew Antony pawhin thu a sawi a ni.
Rahul man vangin MPCC pungkhawm
