Raicheha thi chhungte cheng
nuai 52 pe turin Court-in a ti
Mizoram State Consumer Dispute Redressal Commission (State Consumer Court) chuan Serchhip District Hospital-a raicheha thi Malsawmkimi, Tlangpui khua ami chungchangah Mizoram sawrkar chu Rs. 52,20,800 zangnadawmna pe turin a ti.
Commission sawi danin, kum 2021 khan Malsawmkimi, Tlangpui khua hian nau nei turin Serchhip District Hospital panin a inentir a. Ultrasound tih a nih hnuah nau nei turin Serchhip damdawi inah admit a ni. Admit a nih hnu hian damdawi hmangin nau vei chawp tir a ni a. A ni hnihna zan dar 8.30 ah naute hi thi sa in a hring a ni.
Nau vei tir a nih hma hian naute leh a nu hi an tha vek niin doctor chuan a ngai a, mahse naute hi thi saa a pian hnu lawkah thi put neiin a thi put a nasat tak avangin hemi zan dar 10.40-ah Malsawmkimi hi Post Partum Haemorrhage (PPH) avangin a thi ve leh a ni. Malsawmkimi hian a hmain nau vawi 4 a lo chhiat tawh a, neih pangngaiin nau pathum a nei tawh thung.
He thil thleng avang hian social media-ah Serchhip District Hospital hian dem a hlawh hle a. Sawrkar pawhin magisterial equiry tiin Serchhip district magistrate enfiah tir a ni a. Malsawmkimi hian nau vawi 4 a chhiat tawh avangin zai chhuah (Saesarean Section) an dil nia sawi chu Hospital-a thawktute hian an dil lo niin an sawi. He hospital-a nau nei tawh thenkhat chuan hospital staff-te hi damlo an enkawl danah an vin thei hle nia sawi a ni bawk.
Magisterial enquiry report hian medical expert team-in enfiah se tia rawt angin, Civil Hospital Aizawl atangin Malsawmkimi thih danah tihsual emaw felhlel a awm em, tih enfiah tir leh a ni a. Vawi engemawzat nau a lo chhiat tawh avang leh amah kum 40 a nih tawh avangin, nau zaichhuah theihna hmun pan tura tih awm tak a ni tih chu medical expert-te ngaihdan a ni tih report-ah tarlan a ni.
Malsawmkimi thih chungchangah hian a pasal Zaithankima chu Gauhati High Court Aizawl Bench-ah a zualko a. Gauhati High Court hian Serchhip District Hospital-in Malsawmkimi an enkawl danah felhlel awm ngei nia a hriat avangin cheng nuai 5 a lo chawitir tawh a. Chutih rualin zangnadawmna tam zawk phuta hmun danga an zualko duh a nih pawhin a phalsak angin, Zaithankima hian State Consumer Court-ah thubuai thehlutin a zualko leh a ni.
Thubuai an thehluh chhannaah Health Services principal director chuan Tlangpui Health Sub Centre-a a inentirna atanga a lan danin Malsawmkim hian Anaemia with Chronic Hypotension a vei niin a ngai a. Chu chu Serchhip Hospital-a doctor-ten ngaipawimawh loin Anaemia atan hian an enkawl zui loa, heng avang leh doctor an nihna anga an mawhphurhna an hlen tawk loa ngaiin Serchhip District Hospital-a thawkte hi thiam loh a chantir a ni.
Serchhip District Hospital-a Malsawmkimi’n nau a neih lai hian Hospital-a thawk nurse ni lo, midang aikalin a enkawl tih sawi a ni a. Hei hi State Consumer Court chuan a ngai thutak hle a. Hospital-a nurse thawkte hian anmahni tih tur ti loa midang dam lo an enkawl tir chu pawi a ti takzet tih a sawi a ni.
Raicheha thi chhungte cheng nuai 52 pe turin Court-in a ti
