Raj Bhavan-ah exhibition nei

Raj Bhavan-ah exhibition nei
Raj Bhavan Secretariat leh Commerce & Industries department tangdunin Mahatma Gandhi piancham lawmna denchhena a buatsaih, ni thum awh Gandhi Jayanti Exhibition chu Thawhtanni khan Circular Lawn Raj Bhavan-ah neih tan a ni.
A hawngtu larsap Dr Hari Babu Kambhampati chuan exhibition hi Gandhi zirtirna zulin khawtuala kan thil siam leh dehchhuah ngaihhlut inzirtirna bakah kan khawtuala sumdawng leh kuthnathawktute chawikanna atana buatsaih a ni, tih a sawi a. Mizoram ang state tenau zawkah chuan handloom industry, micro, mini leh medium business unit lam hawia entrepreneur-ten hma an lak a fuh ber tih a sawi.
“Kan state a lian loa, mihring kan tlem bawk si a, industry lian pui pui din a remchang lo maithei. Mahse, kan tualchhunga tharchhuah leh in lamah kan lo siamchhuah theih apiang hi hlawk takin sumah kan chantir thei a. Hemi huanga eizawngte hi kan duhsak a, an thilsiam kan hlutsak a ngai a ni,” a ti.
Commerce & Industries minister Dr R Lalthangliana chuan entrepreneur-te tana hun pawimawh tak Raj Bhavan-a a lo thlen avangin larsap hnenah leh exhibition buatsaihna senso engmawzat tumsaktu Ministry of Textile chungah lawmthu a sawi a. Sumdawngte, a bikin handloom leh handicraft huanga hma latute chu an thilsiam a mawimam chho zel a, belhchian a dawl telh telh nia a hriat thu sawiin, tan la zual sauh sauh turin a fuih. Mizo puan, kawr leh thawmhnaw bakah handicraft huang kutthemthiamte thilsiam chu a mawimam a, belhchian a dawl a nih phawt chuan a leituten sum tam zawk sengin an lei ngam reng niin a sawi bawk.
Exhibition hi a duh apiang tan a tlawh theih a. Dawr 62 a awm a, hengah hian handloom lam thil bakah kutthemthiamna atanga siam thil, food processing unit atanga siam ei tur, food court bakah PM Viswakarma Yojana ngaihven duh tan help desk leh loan la duh tana pan tur help desk chhawp chhuah a ni.