Rajasthan minister leh a hoten
Mizorama hnathawh rawn zir
Rajasthan sawrkara Panchayati Raj minister Madan Dilawar leh amah zuitu official leh Panchayati Raj member mi 21 chuan sawrkar laipui Ministry of Panchayati Raj (MoPR) hnuaia scheme – Rastriya Gram Swaraj Abhiyan (RGSA) hnuaia hnathawh en thlithlaiin Mizoram Exposure Visit an rawn nei.
Thawhlehni khan Rural Development & AD minister Prof. Lalnilawma’n lo kawmin sawrkar hmalak dan an sawiho a. Intlawhtawn a, inzirtawn thin chuan rah tha a chhuah zel a beisei tih sawiin, thingtlang hmasawnna atana hmalaknaah pawh hnathawh dan tha zawk leh chin dan tha zawk chhar chhuak a, inhrilh tawn zel theih a ni tih a sawi.
RGSA state programme manager John Lalnunsanga chuan Rastriya Gram Swaraj Abhiyan (RGSA) hnuaia hnathawh hrang hrang a sawizau a ni.
Rajasthan minister chuan Mizoram RD&AD-in a lo dawnsawn dan fakawm a tih thu a sawi a. Rajasthan tlawh ve thuai turin RD&AD minister leh a thawhpuite an sawm a ni.
Thawhlehni khan Rajasthan sawrkar aiawhte hian Reiek leh Ailawng-a RGSA Scheme hnuaia hnathawh an tlawh a. Sawrkar hmalakna hrang hrang an thlir a ni. Hemi hnu hian RD&AD minister leh Education minister Dr Vanlalthlana hoin an inkawm a; ruahman dan chuan, vawiin – November 19 hian Falkawn-a Zokhua leh Zoram Medical College & Hospital an tlawh dawn a ni.
Rajasthan minister leh a hoten Mizorama hnathawh rawn zir
