Daily Newspaper

Rajasthan politics in buai lam pan zual zel, inpuhmawh nasa

42

Congress te chuan Rajasthan-a Congress sorkar tihtluk a nih theih nan Union Minister Gajendra Singh Shekhawat chu a inhnamhnawih tia sawiin State police hnuaia Special Operations Group (SOG) tena an finfiah a nih chuan leh ‘a landanah chuan’ a inhnamhnawih bawk avangin a bang tur a ni tiin an sawi.

Congress chief spokesperson Randeep Surjewala chuan press conference Jaipur-a a neihnaah rebel Congress MLA leh Shekhawat te inbiakna audio clips a tarlang zui nghal bawk a.

He audio clip-ah hian Shekhawat chu phiarruknaah inhnamhnawih chiangin chungah chan thamna, black money inthleng leh hawala transaction te pawh a tel an ti bawk a. SOG chuan FIR ziaklutin an chhui tur a ni, a ti bawk.

Congress leader chuan MLA tlantau Bhanwarlal Sharma leh BJP leader Sanjay Jain te middleman atangte lakah criminal case siam turin a ngen bawk a. Heng audio clip te hi mipui hriat theih turin Ninga zan khan tlangzarh a ni.

Surjewala chuan Churu district a Sardarshahar constituency MLA Sharma leh Vishvendra Singh, Tourism Minister hlui te chu Congress atanga ban an nih thu a sawi bawk.

Union government a ‘mi thiltithei’ te leh agency te chuan Rajasthan State sorkar paihthlak tumin chet an la tia sawiin Congress te chuan rebel leader Sachin Pilot, Deputy Chief Minister atanga ban pawh chuan BJP te hnenah amah thlawptu MLA list a pe lut tia puh chungchang chu a sawifiah tur a ni, an ti bawk.

Pradesh Congress Committee president ruat thar Govind Singh Dotasra chuan BJP te chuan a hma in Madhya Pradesh, Karnataka, Goa leh Maharashtra sorkar an phet thlu tawh a, mahse, tunah chuan an thlang sual ta a ni tia sawiin Congress sorkar chuan Rajasthan-ah kum nga a hmang zo ang, tiin a sawi bawk.

Hetihlai hian rebel Congress leader Sachin Pilot leh MLA 18 te chuan Assembly Speaker in disqualification notice a pek chungchangah High Court aah an zualko a. Pilot camp lam chuan Assembly pawna policy leh hruaitu thenkhatte nena inmil lohna avang ngawtin ban theih an ni lo tiin an sawi.

Speaker C.P. Joshi chuan nilaini khan Congress Chief Whip Mahesh Joshi ngenna angin MLA rual te chu Congress Legislature Party (CLP) meeting tum hnihah an tel loh thu sawiin ‘sorkar paihthlak an tum a ni’ tiin a zualko a.

Sachin Pilot leh Minister hlui Vishvendra Singh leh Ramesh Meena te telin nimin tlai thleng khan insawifiah tura tih an ni a. MLA tlantau te chuan House member nihna an la bansan loh thu leh CLP meeting tum hnih an tel loh avang ngawta party atanga bang an ni tihna anih loh thuin an chhang zui a ni.

Rebel MLA te hian lawyer atan India lawyer tha ber ber pahnih Mukul Rohatgi, Attorney General hlui leh Harish Salve te an ruai a ni.

MLA lungawilote hi ban an nih chuan Assembly member 200 awmnaah Chief Minister Ashok gehlot sorkar chuan floor test ah awlsam zawkin chakna an chanphah mai dawn a ni.

MLA lungawilo hotu Sachin Pilot thung chuan Congress party a chhuahsan loh thu leh chhuahsan tumna a neih loh thu a sawi thung a. “Democracy ah chuan thlan lal tupawh policy thenkhat leh thutlukna siamah lungawilohna a neih a lantirin party kalhin a che tihna a ni kher lo,” tiin a sawi.

Raje in Gehlot sorkar tihtluk remti lo
Hetihlai hian Rajasthan-a BJP te thawhpui chuan Chief Minister hlui Vasundhara raje chuan Ashok Gehlot sorkar chu humhima tum tiin a sawi thung.

“CM hlui Vasundhara Raje in a theihtawp chhuahin Ashok Gehlot sorkar hum a tum a, he mi chungchangah hian Congress MLA thahnem takin an bia a ni” tiin Hanuman Beniwal, Lok Sabha MP chuan a sawi.

Raje chuan tun thlengin engmah sawi a la nei lo va, Rajasthan politics buaiah pawh mipui hriat sawi a la nei lo bawk a, Raje hi senior BJP leader niin State CM term hnih ni tawh a ni.

Beniwal hi BJP leader hlui leh Raje nena inhal tak niin Raje leh Chief Minister Gehlot te chuan ‘chhunglama inhriat-thiamna’ an nei tiin a sawi.

Beniwal hi Rashtriya Loktantrik Party hotu lu niin Centre a BJP kaihhruai NDA sorkar langsar taka thlawptu a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy