f election commissioner (CEC) thar a ni danw tih Thawhtanni zan khan union law ministry chuan a puang a. Thawhlehnia kum 65 tlinga chhuak tur, Rajiv Kumar a thlak dawn.
CEC nih theih hun hi kum ruk a ni a, kum ruk an thawh hmaa kum 65 an tlin erawh chuan an chawlh a ngai a. Kal chhuak tur, Kumar-a hi dan thar hmanga CEC atana ruat hmasak ber a ni.
Kumar-a hi Prime Minister Narendra Modi-a kaihhruai selection committee-in a thlang a. Committee-ah hian Union Home Minister Amit Shah leh Lok Sabha-a Leader of Opposition Rahul Gandhi an tel bawk.
Committee hi Thawhtanni tlai khan South Block-a Prime Minister’s Office-ah an thukhawm a. Search committee-in CEC thar ni tura a rawt hrang hrangte an thlir a ni.
Kumar-a hian CEC a nih atanga rei lo teah state pali inthlan a kaihruai dawn a. Eptute rorelna pahnih, West Bengal leh Tamil Nadu leh BJP rorelna, Bihar leh Assam an ni dawn a. Bihar hi kumin kumtawpa inthlang mai tur niin a dangte hi nakumah a ni ang.
Kerala cadre 1988-batch IAS officer hi union home ministry-ah hnuhma lian tak tak nei tawhin kum 2019-a Jammu & Kashmir inhung bikna dan hlihna, Article 370 duangtu zinga tel niin Shah-a nen pawh inhnimhnai tak nia sawi a ni thin.
Kum 61 mi a ni mek a, Jammu & Kashmir then a nih hnuah home ministry-ah hian joint secretary (Kashmir Division) a ni zui nghe nghe.
Kum khat hnuah additional secretary ni zuiin Supreme Court-a Ayodhya, Uttar Pradesh-a Ram Temple thubuaia lehkha pawimawh hrang hrang ena chingtu, sorkar tanfung tur siamtu ber a ni.
Nikum January khan Shah-a enkawl tho, cooperation ministry-a secretary ni chungin a kum bi liamin a chawl zui a. Hemi hma hian parliamentary affairs-ah secretary a ni tawh a. Congress kaihhruai United Progressive Alliance sorkarah khan defence ministry-ah chanvo pawimawh tak a lo chelh tawh bawk.
Thiamna lamah Kumar-a hi Kanpur-a Indian Institute of Engineering atangin Civil Engineering-ah B.Tech degree a nei a. Institute of Chartered Financial Analysts of India-ah Business Finance a zir a, Harvard University atangin Environmental Economics-ah degree a nei bawk.
Rajiv thlaka CEC thar tur Gyanesh Kumar
