Mizoram Rajya Sabha MP K Vanlalvena chuan Ningani khan 22nd Law Commission of India hnenah Uniform Civil Code hman tumna awm mek dodalna thu a thehlut.
Law Commission member secretary Khetrabasi Biswal hnenah lehkha thehlutin, Mizoram chu British kuta a luh hmain kum tam tak mahnia ro inrel thin a nih thu te; British awpna hnuaia kum 57 chhung a awm lai pawhin India rama a tel ngai loh thu te; British lak atanga India Independence sual lai zawng zawng pawhin Mizoram chu India ah a tel ve loh thu te a sawi a. Kum 1947-a India ram thar a pian hnuah Mizote awm dan tur chingfel hmasa loa British hoin an chhuahsan tawp avangin India constitution ah pawh engmah tarlanna awm loin Mizoram chu India-a a beh tak hnu ah, kum 20 chhung MNF-in India ram atanga zalenna a sual tih sawiin, 1986 June 30 ah India leh MNF inremna angin Indian Constitution article 371(G) chu Mizoram venhimna bik atan siam a lo nih tak thu te a thlen a ni.
UCC hman a nih chuan article 371(G) a khawih pawi theih tur thu leh chutah chuan Mizote humhimna hrang hrang – ram neitu nihna, Mizo sakhua leh vantlang nun, Mizo hnam dan leh culture humhimna a inziah thu K Vanlalvena hian a sawi a. UCC hian Mizo hnam himna dan hi a tihchhiat theih dawn avangin na taka a dodal thu leh North East tribal hnamte tan pawm theih a nih loh thu a sawi bawk.
Tunlai hian Law Commission 22-na chuan Uniform Civil Code hi India ramah hman chi a nih leh nih loh a zirchiang mek a. Kumin June 14 atanga chhiar tanin ni 30 ral hma ngeia Union Law Commission hnenah mahni ngaihdan thehluh theihna hun hawn a ni. Ngaihdan hrang hrang lakhawm hmasain Parliament Sessionah putluh chi a ni dawn nge dawn lo tih zirchian a ni.
Rajya Sabha MP-in UCC dodalna thlen
