Rajya Sabha MP zinga 32% velin thubuai nei

Rajya Sabha MP zinga 32% velin thubuai nei
Association for Democratic Reforms (ADR) report chuan Rajya Sabha MP tang lai zinga 32% velin thubuai an nei a, 14% chu mi hausa tawntaw (billionaire) an ni bawk.
Rajya Sabha MP 233 zinga 229-te affidavit bihchianna atangin report hi siam a ni a. Jharkhand-a bial khat a ruak a, MP pathumte affidavit erawh a la awm lo va. Bihchiannaah hian tun hnaia member thlan thar 37 an tel.
MP 229 an zirchian zinga 73 (32%) chuan thubuai an nei a, heng zinga 36 (16%) chuan thubuai lian tham an nei mek a. MP pakhatin tualthah thubuai a nei a, pali chuan tualthah tum thubuai an nei a, pathum chuan hmeichhe laka pawikhawihna kaihhnawih thubuai an nei bawk.
Party hrang hrangah BJP MP 99 zinga 27, Congress MP 28 zinga 12, TMC MP 13 zinga pali leh AAP MP 10 zinga pali te chuan thubuai an nei tih an tar lang hlawm a. CPI(M) leh BRS atangin MP pathum ve vein thubuai an nei bawk.
Report-ah hian MP 31 (14%) chuan Rs. vaibelchhe tam tak an nei tih tar lan a ni a. Party lian zingah BJP MP paruk, Congress MP panga, YSRCP MP pali, AAP MP pahnih, BRS MP pahnih leh NCP MP pathum chuan Rs. vaibelchhe 100 chuang sum an nei a ni.
Rajya Sabha MP pakhat sum neih zat chu Rs. vaibelchhe 120.69 zel anga chawhrual theih a ni.
Party lian zingah MP pakhat sum a neih zat chawhrualin BJP-in Rs. vaibelchhe 28.29, Congress MP-ten Rs. vaibelchhe 128.61, TMC-in Rs. vaibelchhe 17.70, AAP-in Rs. vaibelchhe 574.09 an ni. Party dangte chu YSRCP (Rs. vaibelchhe 522.63), SP (Rs. vaibelchhe 399.71), BJD (Rs. vaibelchhe 105.63) leh DMK (Rs. vaibelchhe 11.90) te an ni.
BRS MP Bandi Partha Saradhi-i chuan a hausa ber a, Rs. vaibelchhe 5,300 chuang a nei tih a tar lang a, AAP MP Rajinder Gupta-a pawhin Rs. vaibelchhe 5,053 a nei a, YSRCP atangin Alla Ayodhya Rami Reddy chuan Rs. vaibelchhe 2,577 chuang a nei bawk.
Hetih lai hian AAP MP Sant Balbir Singh chu rethei ber niin a sum neih zat hi Rs nuai 3 vel a ni a. A dawtah Manipur-a Maharaja Sanajaoba Leishemba chuan Rs. nuai 5 vel a nei a, TMC MP Prakash Chik Baraik chuan Rs. nuai 9 vel a nei bawk.