Daily Newspaper

RALKHEL DAR EM KAN VAW BIK LO…!

10

Ramchhana Hmar
Phuaibuang

Keini chu thingtlang mi, khaw hawi zau lo, hlauh ngah, mi fing awm mahse, dawi tawk leka mi hawi zau lo tamna kan ni. Chuvangin kan phak tawkah kan fimkhurin hlauh pawh kan ngah hle mai.

Social media remchangah lain mi thenkhatin Covid 19 avanga thingtlang mi min demna te hi kan hria a. Kan lo fimkhur luatah sawrkar pawhin thuchhuah hial neiin mahni khawbilin dan kan siamte ken kawh a rem loh thu te, DC kaltlangin thuchhuah pawh kan hmu a, he thil hi Aizawl mi leh hmun danga mite kan ngainat loh vang a ni lova, kan phak tawka kan lo fimkhur vena a ni. Aizawl pawh lo rap tawh lo maisela tia thingtlang mite min beihna hi hetiang te hi chu thleng lul lose kan va ti em! Keini thingtlang tan chuan Aizawl hi kan Jerusalem a ni a, kan engkima engkim a ni a kan tan a hlu em em a ni. Hrileng hi kan hlau a, kan mamawh leh thil dangte pawh ngaipawimawh hleithei lovin kan awm a, hri darhna hmun te a theih chin china tlawhpawh loh hram dan kan ngaihtuah a. Hri lenna atanga keini khua tehlula lokalte pawh tum dang ang chuan kan lawm thei lo a ni. Kan hlau a, kan manganga theih tawkin hma kan la ve mai a ni a, famkim lohna khawvelah hian kan famkim bik lo a ni tih pawh kan hrechiang hle mai. Tih diklohte kan nei a nih chuan insiamthat pawh kan lo tum zel ang nge.

Heti hian inthlir thuak teh ang, keini thingtlang hi Pathian zarah hripui lakah kan la him a, kan eizawnna kawng pawh kan zawh zel thei a, kan lawm hle mai. Khawtlang hruaitute’n dan an siamte theih ang tawkin kan zawm a, kan him chung pawha dan zawm tur kan neih reng avang te hian mitinte kan fimkhur zual phah a, hei vangte pawh hi a ni ang, Pathian zarah hrileng lakah kan la him hram hram a ni. Thingtlang damdawi in pawh awm mumal lohna hmunah hian vanduaithlak takin covid 19 hri kai lo awm ta se, khawpui ai chuan kan buai ngei ang. Kan awmna atanga quarantine centre hnai ber pawh kilometre 50-100 te a ni dawr a, hei ringawt pawh hi kan tan chuan mangang pui tham a ni. Inenkawlna tur pawisa sawrkarin a tum theih chin awm mahse, kut ruaka damdawi in luh ngawt chu khawpui mi te pawh hian induh bik lovang, sum avanga inhlawhna tur a awm reng lova, kan eizawnna kawng zawh hi bawhpelh theih loh tluk a ni a, kan kum khat hnathawh rah kan seng zova, hmarcha lawh angai a, lo vah a ngai leh bawk a, hengte hi tlai thei thil a ni a, hri kai pakhat lek pawh nei ila, kan feh kawng zawh a inanga, kan mamawh lamkhawmna dawr pawh khawpui angin a tam si lo, dawr 2,3 vel awmah mamawh a kim loh avangin kan inluhchhuah tawn reng a, kan tan chuan fimkhur loh theih pawh a ni lo.

Khawpui mi angin media hmanga he hrileng laka inzirtirna tha, hri kai endawng lova tanpui dan a awm chuan tanpui zawk tur a ni, tia media kaltlanga kan thusawite hi keini thingtlang lamah chuan khawpui angin current te nei tha hek lo, kan hre ve vek lem lova. A hriate’n sawi mai ula inti maithei e, i thenawmpa a positive-a i hlauhzia ka ngaihtuah hian midang han hnem chi ziazang i ni lova, nang aiin kan mawl maithei, kan hre tlem bawk a, nangpawhin i theih loh turah khan keini thingtlang mimawl hi min phut bik lul suh. Thu tha hriaa zawm hleithei lo chu nang leh kei bawk hi kan nih kha.

Lockdown tur tih puan a nih veleh ei leh in tur leikhawla khawpui mi in inhnawh khawm luih luih ang kha kan ti thei ve lo, sum a awm lova, nangnin nghei in hlauh ang bawk khan kan tu leh fate riltam hi kan phal bik lo, khawpuiah chuan vanduaithlak taka hri kai an awm pawhin damdawi ina kalpui nghal an ni a, keiniah erawh chuan eng motor in nge kan kal ang, tih ringawt pawh hi ngaihtuahna tibuai thei a tling a ni. Quarantine centre tam tak khawpuia a awm laiin keini chuan quarantine centre awmna pan tur ringawt pawhin pawisa kan insen fe loh chuan kan tan thlen a har a ni. Mahni inlumna inkhung hranna tur a hranpain kan nei lo, khawpuiah chuan mahni inlumna inkhung hrang thei, ei leh in tur pawh a hranpaa ti thei tam tak an awm laiin keini chu nitin kan eitur pawh thlantui far zawih zawiha ngaihtuah chawp ngai te kan ni hlawm a, kan tan chuan hri hi hlauh loh rual a ni lo. Kan hlauh dan a uchuak annih pawhin a mak lo a sin. Harsatna hmuna lo inven hi thil pawi a ni dawn em ni? Covid free certificate kan lo phut thin a nimai thei, sawrkar in a phal tawh lova, phut ngam kan ni lo; mahse, kan khaw chhunga lut turte chuan dan an zawm thei tur a ni a, kan dana leng lo tan thingtlang lam khuaah luh a har mai chauh a ni. Kan fimkhur viau chung pawhin buaina lian zawk tawk thei kan ni a, chuvangin fimkhur loh lutuk luata buaina tawh ai chuan kan tan ala tha zawk fan a nia.

Hetiang khawpa kan hlau leh kan fimkhur chung pawha khawpuia veng thenkhat ten an phut ni chuang miah lova thingtlang khaw thenkhatte an lo luangchhuak thei te hi a ropui khawp mai. A pawimawh berah chuan kan awm hmun theuhah hian fimkhur zel ila, mamawh nei tlem ila, thil thenkhat hi chu a tel lo pawha khawsak thiam kan zir ngai pawh a awm maithei e. Khawpuia awm kan mamawh thenkhat te hi mamawh ngawih ngawih chunga lo lak loh te pawh thingtlang mi chuan kan zir mek a, lirthei neitute pawhin tun dinhmunah chuan khawpuia lokal hi an phur lutuk si lova, Pathian zarah chhuanchham em chu kan la awm lo nain mamawh tawpkhawkah chuan khawpuiah hian kan lokal ve thin. Chuvangin khawpui mi hlauh luatah ralkhel dar kan la vaw bik em lo a nia. Mahse, kan theihtawpin kan fimkhur ve a. Khawtlang hruaitute’n an phut pawh ni chuang lova, mahni khua leh kan kal duhna hmuna miten min hlauh loh nana covid free certificate nei duh tal an awm chuan eng nge thil pawi chuang le? An fihlim a ni tih kan hriat te chu kan hlauh bik lo a nia.

Hawhteh u, thingtlang khua te hi i fimkhur zel ang u, kan la him a, inveng thei kan nih lai hian inveng tlat ang u. Min sawisela min dem tu then khatte hi chuan kan nikhat ei pawh min tumsak chuang dawn si lova, kan tan a ni a, sawrkar thu ngaichang zelin fimkhur tawpin i fimkhur zel ang u. Heng mite hian kan dinhmun an hriatthiam loh vang mai chauh a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy