January ni 10 leh ni 11-a Myanmar sipaite’n indo thlawhna hmanga Camp Victoria an beih hnuah Farkawn velah raltlan an pung a, India sipaite pawhin Farkawn vel hi an vil tih thu dawn a ni.
Myanmar-a hel pawl lian Chin National Army (CNA) te hmunpui Camp Victoria hi Farkawn ral lehlam, Myanmar lam |iau kam maia awm a ni a, Camp Victoria chhehvel khua atangin mi engemaw zat Mizoramah an raltlan a ni.
Thu dawn danin, Inrinni thleng khan Farkawn-ah raltlan chhungkaw 93 an luh belh tawh a, mi 346 vel an ni. An zingah hian kum 18 la tling lo mi 93 an awm.
Farkawn-ah hian raltlan hi chhungkaw 184 vel an lo awm sa a, lut tharte hian anni hi an bel tlangpui a, chhungkaw 10 vel chu mahniin an awm hrang.
Hriat theih chinah Samthangah chhngkaw pali, Vaphai-ah chhungkaw 13 an lut thar a, Thekte-ah mi pathum an lut thar bawk.
Nikum lam angin raltlante hi tanpuinaah an innghat tawh rih lo a, a theih theih thawka an indap chawp bakah foreign-a an chhungte atangin pawisa fai an dawng thin bawk tih thu dawn a ni.
Farkawn-a raltlan lut thar, kum 18 la tling lote hi sikul an kal rih lo a, session laklawh lai a nih avangin sikul luhtir tumna pawh a awm rih lo tih thu dawn a ni.
Farkawn atanga thu dawn danin, Farkawn vel hi India sipaiin an vil a, Farkawn-a Assam Rifles camp-ah pawh radar an dah thar. Sipai lalin mi hriat lohvin Farkawn vel hi an tlawh thin tih thu dawn a ni a, kar hmasa Nilaini pawh khan sipai motor, motor number chhiar theih loh tura tihberh, chutiang chu Farkawn ram velah an kal tih thu dawn a ni bawk.
Farkawn velah hian Indian Air Force helicopter a thlawk thin a, Boing C-H-47 Chinook pawh Farkawn-ah a tum tawh. Helicopter hian ramri vela duty tur a dah a ni.
Camp Victoria velah inkah leh inbeih a awm tawh rih lo a, mahse a chhehvel khaw mipuite an ralmuang lo a, Myanmar sipai an che leh ang tih hlauhna a awm avangin Mizoramah an raltlan a, pung thei an ni tih thu dawn a ni.