Raltlan lut thar, YMA-in enkawl

Tun hnaiah Vaphai-ah Myanmar atanin raltlan mi 40 chuang a huhovin an lut leh a, Vaphai YMA-in an enkawl mek.
Vaphai-ah hian kar hmasa, December ni 27 khan mi 46 an raltlan a, YMA-in Community Hall-ah dahin, ei leh in tur te, mutbu leh thawmhnawte pein an enkawl mek.
Vaphai atanga thu dawn danin, raltlan thleng tharte hi Khualsim Haimual khaw mi an ni a, Saikhumphai an lut a, chuta tang chuan Vaphai YMA te’n Vaphai-ah an hruai lut a ni.
Khualsim Haimual hi Falam bula mi a ni a, raltlante sawi dan chuan, sorkar sipaite’n Falam luhchhuah an tum a, an kalkawnga khaw lo awm Khualsim Haimual hi an hal a, tichuan an tlanchhe ta a ni. An khua hi in 15 khua a ni a, sipai hian in zawng zawng an hal kang a, a khaw mi zawng zawng (mi 46) chu Saikhumphai panin an tlanchhe ta a ni.
Mutbu leh hakthlak tlem azawng chu an nei a, bungraw keng thei an nih loh avangin tlem azawng tak tak chauh an chhuahpui, Vaphai YMA hruaitute chuan an ti.
Community Hall-ah an awmtir a, chaw an pek bakah mutbu leh hakthlakte an ngaihtuahsak. A tir lam ni thum vel chu YMA hian an chawm a, district thuneitute’n an mamawh tur chu a baa lo la mai tura an tih hnuah tunah chuan YMA senso ni lovin YMA hian an enkawl tawh.
Champhai district-a Vaphai khua hi in 480 vel an ni a, a hmain raltlan mi 630 an awm sa. Anni hi chu relief camp-ah leh in luahin an awm tawh a, eitur pawh mahniin an indap tawh.