Raltlan lut tharte kir leh

Raltlan lut tharte kir leh
Myanmar atanga tun hnaia Mizorama raltlan thenkhat chu Inrinni khan mahni khaw lamah an kir leh a, chawlhkar tharah pawh mi dang an kir a rinawm tih thu dawn a ni.
Champhai district-a Zokhawthar-ah Myanmar lam khaw hmasa Khawmawi leh Rih atangin mi engemaw zat tun hnaiah a raltlan a, Inrinni khan engemaw zat an kir. Chawlhni-ah thenkhat an kir leh bawk.
Police te’n an chhinchhiah danin July ni 12 khan mipa 1197 leh hmeichhia 1132, an vaiin mi 2319 an kir a, tukah tlai dar 3.45 thleng khan mi 132 an kir leh.
Mahni khuaa kir duhte tan July ni 12 khan zing dar 6 atanga tlai dar 5.30 thlengin leiah police leh Assam Rifles te’n gate an hawng a, ni 13 kha chuan an hranpaa hawng lovin, kir duh in-report an awm chuan an hawnsak thin.
July ni 4-6 velah khan Khawmawiah hian Chindland Defence Force (CDF), Hualngoram leh Chin National Defence Force (CNDF) te nasa takin an inkap a, Khawmawi khaw mite an zavai deuh thawin Zokhawtharah an tlanchhia a ni. Chumi hnuah Khawmawi chhak lawk Leilet khuaah CNDF leh CNA an inkap leh a, Leilet bul Rih khaw mipuite Zokhawtharah an tlanchhe ve leh.
Khawmawia an inkah hnuah CNDF te’n Khawmawi vel hi an awp a, mahse an inpu chhuak leh. July ni 11 atang khan a hmaa lo awptu Hualngoram People’s Organisation (HPO) te’n an awp leh. CDF, Hualngoram hi HPO hnuaia mi an ni. Chumi hnuah Inrinni khan mahni khuaah a kir theih e tiin an kir ta a ni.
Zokhawthar atanga thu dawn danin, a la ralmuang lo ang tih hlau, la ngaichangte an awm a, mahse a ralmuan zel chuan kir ve lei mai tura ngaih chu an ni.
Zokhawthar-a raltlan lut tharte hi police te’n an chhinchhiah chinah mi 3524 vel an ni a, hetah hian naupang an tel loh bakah puitlingah pawh chhinchhiah hman lo engemaw zat an awm.