Sorkar laipuia ministry of home affairs (MHA) te’n Myanmar atanga Mizorama raltlante chhinchhiaha an chanchin bakah biometric details ti turin Mizoram sorkar a ti a, Mizoram lam chuan hei hi bawhzui a nih thu leh, sorkar laipui hi an ngaihchan thu an sawi.Home department hotute chuan he thil hi bawhzui nghal a nih thu an sawi a, mahse MHA lamin portal an la peih loh thu leh, portal ber a la awm loh avangin thil tih tak tak theih a nih loh thu, chu chu an nghah thu te The Aizawl Post an hrilh a, portal hi MHA hian tun thla tawp lamah te chuan an peih an beisei thu an sawi bawk.
April ni 28-ah daih tawh khan union home secretary Ajay Kumar Bhalla kaihhruaiin Mizoram leh Manipur aiawhte leh Assam Rifles DG te an thu a, hemi tum hian Myanmar atanga raltlante chhinchhiaha biometric details lak hi an rel a ni.
Home department atanga thu dawn danin, Myanmar atanga raltlante hi an kutzia lak tur a ni a, chutah chuan kutzungpui pahnih leh kutzungtang dang pali lak tur a ni.
Mizoram sorkarin raltlante hi chhinchhiahin ID card pawh a lo pe tawh a, heta a chhinchhiah hian kutzungpui pakhatah an kutzia lak a ni. Raltlante hi an insawn reng avangin he hna hi zawh fel tawh a ni ti chuan an sawi ngam lo a, mahse a theih chin chu an zo tawhah an ngai. Mahse MHA hian thu dang a neih avangin, a bul atanga tih a ngai leh dawn a ni.
Bangladesh atanga raltlante chu hetianga chhinchhiah tura tih an la ni lo a, mahse MHA hian an tih ngei a rinawm tih thu dawn a ni. Manipur atanga Mizorama tlanchhiate erawh, foreign atanga rawn lut an nih loh avangin MHA hian hetianga chhinchhiah hi tul a ti lo.
Raltlante chhinchhiah hnaah Mizoramin sorkar laipui nghak
