Raltlante hnenah buhfai hlan
Sawrkar laipui leh Mizoram sawrkar hmalaknaa raltlante tana buhfai sem tura ruahman chu Lawngtlai Chanmari Venga Kanaan Refugee Camp-a awmte hnenah Thawhtanni khan hlan a ni.
Lawngtlai district bawrhsap Cheemala Siva Gopal Reddy chuan sawrkar laipui leh Mizoram sawrkarin raltlante dinhmun leh harsatna hria in theihtawp a chhuah thin tih a sawi a. Ei leh bar kawnga an harsatna phuhrukna pakhat atan Lawngtlai district-a raltlan awm zawng zawng hnenah buhfai pek a ni dawn tih a sawi.
Lawngtlai chu international border-a awm a nih angin ruihhlo tawlhruk kawngah fimkhur a tul tih bawrhsap hian a sawi a. A bikin raltlante chu ruihhlo zawrh leh tawlhruk emaw danin a phal loh thila inhnamhnawih lo turin a chah.
Tunah hian Lawngtlai district-ah raltlan (Myanmar, Bangladesh, Manipur) 8020 awm mekin, a tam ber chu Lawngtlaia awm an ni. Raltlante tan hian buhfai quintal 1520.22 sem a ni dawn a, Rs. 1,500,000 senna tur niin, a hma thei ang bera refugee camp zawng zawnga hlan tum a ni.
Raltlante hnenah buhfai hlan
