Zoram Entu Pawl leh Catholic Relief Services (CRS) tangdun buatsaihin Zirtawpni khan Champhaiah Manipur leh Myanmar atanga raltlante hnenah tanpuina sem a ni a. Champhai district bawrhsap James Lalrinchhana chuan a hmanpui.
He hmalaknaah hian Manipur raltlan chhungkaw 39 hnenah basic needs support – buhfai kg.125, thingpuife, bawnghnute powder, chi, chini, nutrela, dal, tel, blanket leh a dangte hlan a ni a. Chhungkaw 30 hnenah health safety kits – bucket, plastic no, blanket, toothpaste, nail cutter adt hnenah leh, hmeichhe tan bika duan dignity kits – pads, underwear, antiseptic soap adt. mi 350 hnenah sem a ni.
Bawrhsap sawi danin, Champhai district-ah Myanmar atanga raltlan mi 12000 leh Manipur atanga raltlan 400 vel an awm nia chhut a ni a. Raltlante chu India ram dan leh thuneihna hnuaia awm an ni tih hria a, engti zawng maha dan bawhchhe lo tur leh kawng engkima YMA leh VC-te thu awih thin turin a chah.
Raltlante tan hmanrua sem
