Ram 26-in Ukraine-a sipai dah inpeih – Macron

Ram 26-in Ukraine-a sipai dah inpeih – Macron
Inkahhai atana inremna a awm tuk atangin khawthlang ram tangrual 26 chuan Ukraine-a ‘lei, tuipui leh thlawhna hmanga’ an sipaite dah nghal turin an inpeih tih Emmanuel Macron-a’n a sawi.
Silai ri a tawp ruala Kyiv tana himna pek an inring tih French hruaitu hian ‘Coalition of the Willing’ tia an sawi mai, ram 35-te Ningania an intawh khawm hnuah a sawi.
Hetih lai hian thla hmasaa Alaska-a Russian President Vladimir Putin leh US President Donald Trump-a an inbiak hnuah pawh indo a tawp mai beiseina erawh a la awm lo zel a. Hmaichhana Putin-a leh Ukrainian Volodymyr Zelensky te inbiak pawh a thlen mai hmel loh bawk a, Trump-a erawh chuan ‘a thlen theih nan kan bei zel’ tih a sawi thung.
Trump-a pawhin khawthlang ramte hi an inhmuh khawm hnu lawkah phone-in a bia a, Macron-a chuan US pawhin an tum a thlawpna hi ni rei lo te hnuah an tihfel thei a beiseiawm tih as awi.
US hi a inrawlh ve em tih finfiahna erawh a la awm lo va; mahse, Macron-a chuan Ukraine himna turah hian US hi ‘rinhlelh rual lohvin’ a tel ve niin a sawi thung.
Trump-a hian tun hnai khan US chuan boruakah a ‘tel ve mai thei’ tih a lo sawi tawh a, Zelensky-a hian tun hnaiah US president hnenah hian ‘Ukraine chung boruak venna tha thei ang ber’ chungchang a sawipui tih a sawi a, Kyiv hian US tel ve theihna tur pawh a ruahman tih a sawi bawk.
Trump-a hian EU chu US nen Russian tuialhthei leh boruakalhthei lak luh titawp tura thawhho a ngai tih a sawi a, hei hi Russia-in ‘eibara indona hmanrua a neihna’ tiin phone-call-a Finnish President Alexander Stubb-a nen an inbiaknaah a sawi a ni.
European Union member ram 27-te chuan kumin kum tawpah tuialhthei leh boruakalhthei an lak luh tihtawp an tum a. White House hotu pakhat chuan Russia hian EU atangin kum khat chhungin tuialhthei leina € tluklehdingawn 1.1 a dawng niin a sawi a, a tak takah phei chuan hei aia tam daih a nih a rinawm tih a sawi.
Ningania khawthlang ramte intawh khawmah hian ram tlema zawng chuan Ukraine-a sipai dah hi an duh tih tlang takin an sawi a, US erawh chuan hei hi a duh rih lo va. European palai thenkhat chuan sipai dah tihtluk nghal chu Putin-a’n khawthlang a beihna remchang siamna a ni dawn niin an ngai ve bawk.
Moscow chuan Ukraine khawthlang ram sipai dah hi a duh lo tih a lo sawi tawh bawk.
Hetih lai hian inkahhai a awm theih nan indawrna a awm mek reng laiin Russia chuan a sipaite chu Ukraine-ah a tirh luh belh zel niin Macron-a chuan a sawi.