Horticulture department hnuaia service ten nimina inkhawmpui an neihah, Mizoram zau zawng zatve aia tam (55%) chu thlai chin theihna (potential horticulture area) a nih thu report-ah tarlan a ni a. Heng potential area atanga 13% chauh hi hman tangkai niin, a bak 42% chu hman tangkai lohvin a awm, tiin tarlan a ni bawk a.
Hetiang deuh bawk hian, buh chin theihna tura leilet siam theihna ram hi hectare singsarih awmin heng zinga 30% vel chauh hi hman tangkai a ni a, a bak 70% vel chu hman tangkai lohvin a awm niin agriculture department lam data-ah hmuh tur a awm bawk a.
A ram hi chuan a daih a, a hmang tangkaitu tur mihring pawhin an daih a, a hman tangkai thiam lamah hian kan thluak hian a daih lo nge? Kan thluak hi chuan a pha a, mahse kan peih lo zawk? Kan peih lo han tih thlawt chu thil dik ber a nih a rinawm loh a, ‘kan duh lo’ han tih dawn pawhin kan duh em em bawk si a. Politician-te hian ram leh mipui hmasawnna tak tak tur hian ‘hma an la na tawk lo’ ti ila, a dik deuh ber awm e. Mi thenkhatin, mipuiin hma an sawn lutuk chuan thuneihna chan a harsa ang tih hi politician-te policy a ni, an ti thin a; chutiang em ema rilru tha lo pu tur chuan kan politician-te hi dah phal tur an ni bik dawn em ni? tih chu zawhna a ni.
Israel ram te, Japan ram te leh ramdang changkang leh hmasawn zawkte hmasawn dan kan hriain kan hmu a. An thiltih dan pawh kan hria a, kan hmu pha vek. Mizoten thawnthu pakhat kan neih, ‘Nahaia chu ni se, heti hian a lo mai tur a…” tih hi a practical hian kan la nunpui zel deuh chu a ni lo maw? tih hi zawhna pawimawh tak a ni awm e. Thlaler ram ro Israel ram a lo hrin chhuah vek dan leh, Israel thlai thar ten Europe khawmualpui a chawm dan te hahipin kan sawi a, kan sawrkar hian loneitute hi, “Engatinge thlai in thar teuh teuh loh?” tiin a chhuahchhal let hlauh mai ang tih te pawh a hlauhawm hlel lo a. Bana kaih ngai kan nihzia hretu sawrkar hian ram hman tangkai loh potential horti area 42% -ah hian mipui hi kai lut duah duah teh se.
Ram hman tangkai loh 42%
