Site icon The Aizawl Post

Ram hring chhiarkawp

India State of Forest Report 2021 tarlan danin kum hnih kalta 2019-2021 chhunga Mizoramin ram hring a hloh zat chu sq. km 185.51 a ni a; heng zinga sq.km. 113.90 chu undivided Champhai district chhunga thleng a ni. Champhai district hi India rama ram kang thlen tam zualna state 11 hnuaia district 26 zingah a tel.
He report hi tun hnaia Champhai district fire prevention committee thutkhawmnaah tarlan a ni.

Mizorama ram hring chin, forest cover zau zawng hi za zela 84.53 a ni a. Mizoram zau zawng hi sqkm 21,081 a ni a, forest cover zau zawng 84.53% hi sq.km 17,819 tihna a ni.
Heti hian han chhut ta ila: Tun ang renga kan kal chhoh zel a, kum hnih dana ram hring sq.km 185.51 zel kan hloh chuan, kum 50 velah kan ram zimtê zatve vel hi chu a kawlh vek thei dawn tihna a ni a; hei pawh hi developmental work-in ram a tihchhiat tur chhut tel miah lovin a la ni lehnghal.

Mizorama ‘ram hring’ kan tih hi, ngaw dur chhah tha (very dense forest) 0.74% leh ngaw dur chhah tha lutuk lo (moderately dense forest) 26.11% a ni a, a bak zawng 57.68% hi chu ramngaw pawh ni lo, ram hring satliah deuh chauh a ni.

Mizoramah rau rau pawh, Champhai district (undivided) hi a ngaihtuahawm hle a. Ram hring hloh zat sq.km 185.51 atanga sq.km. 113.90 hi Champhai district chhung a ni a, chumi awmzia chu Mizorama ram hring hloh zat atanga 61.39% lawih mai hi Champhai district atanga hloh a ni tihna a ni.

Ram hring chhiarkawp atanga kan dinhmun tlangpui lo lang ringawt pawh hi, thlabarna tham a ni tawh. Kan ram hi chhuan lo awm zel turte tana chenna tlaka siam tur chuan, tuna kan dinhmun hlauhawmzia hi mutmawh hnarmawha neih tham a ni takzet tawh a ni.

Exit mobile version