Ram hruaitu an hausak phah vek
An bialmite erawh ding chhuak lo
– BJP president
Ram hruaitua kan thlanchhuahten retheite ngaihsak na tak tak an neih loh avangin an hausak phah vek a, an hruai mipui, an bial mite erawh dinchhuak ta sawi tur an awm lo tih BJP Mizoram president Vanlalhmuaka chuan a sawi.
Thawhtannia an party office-a inkhawmah State BJP president chuan Kristian state kan intih laiin, central atanga min zir tura lokalten min zirchianna atanga an hmuh chu, biak inah nalh taka inkhawm thin, hnathawhnaah erawh Kristian nihna senglut lo nia min hmu chu hriat a nuam lo viau tih sawiin, “Min hmuh dan leh kan nihna erawh ngaihtuah chian chuan a nih hmel thung,” a ti.
Kan politics khelh dan pawh mipui huapzo politics tha kan khel pha loa, vawiin thlengin mahni party mi tlemte chauhin politics hi an la hlawkpui tih a lanchian thu a sawi a. BJP erawh chuan mi zawng zawng tan ruahmanna tha an siam thin tih a sawi.
“PM Modi scheme reng rengah miretheite hamthatna tur a tam em em tih kan hmuh atang hian BJP nih phung chu a chiang hle. Chutiang bawkin state sawrkarah hian BJP sawrkarna emaw state sawrkar-a kan tel ve tak takna sawrkar nei ni ila chuan, BJP hnathawh dan leh miretheite hmangaihtu kan ni tih a takin kan hmu thei dawn a ni. BJP chu kan thusawiah kan tawp ve loa, mipui bumna atan thu kan sawi ve dawn lo. Kan sawi chhuah tawh ang chu kan ti zel dawn thung,” Vanlalhmuaka hian a ti.
Ram hruaitu an hausak phah vek An bialmite erawh ding chhuak lo – BJP president
