ZPM chu an pawimawh satliah mai niloin, ram leh hnam dinchhuah lehna atan pawl ropui tak an ni tih ZPM leader Lalduhoma chuan a sawi.
Thawhlehnia Kawnpuia ZPM Tuirial East & West Joint Block Conference neihah Lalduhoma chuan sem policy-in kan ram a tichhia, tiin, kan rilru sukthlek thlengin ngawng tha lo tak a neih thu leh a nei zel dawn ni pawha a lan thu a sawi. “Kan ram tichhetute chu ruling party an ni zel; an sawrkar chhungin tha taka hnathawk chu awm ve bawk mah se, a tam zawkin hna an thawh that loh avangin kan ramin a tuar ta a ni. ZPM chu kan ram tichhetu kan ni ve thiang lo; chuvangin, kan pawimawh satliah mai a ni lo a, kan ram leh hnam dinchhuah lehna atan pawl ropui tak kan ni,” a ti.
Politics chu khel fuh niloin khel dik turin an inzirtir tih ZPM leader hian sawiin, “Mithate tel ve theihna turin politics hi kan siam tur a ni. Party ruihchilhna hi thalaiteah a awm tawh loa, kum upa lamah hetiang mi hi kan la awm deuh zawk. Thalaite hian thil hi an buk a, thil tha leh tha lo an hre tawh. Neutral mipui kan tam tawh a, hei hian kan ram politics-ah a tha zawngin nghawng a neih kan beisei,” a ti.
ZPM chu sawrkar kan hrawn tawh party-te lakah danglam tur a ni tih a sawi a. Unit, group leh block thlengin an danglam tur a ni tih a sawi. “Keini chuan a system tihdanglam kan zuar a, Pathian zara kan sawrkar a nih pawhin kan danglam loh chuan awmzia a awm dawn lo. System thar hmang turin mithar a ngai; budget pharh thang leh a pawhpen dan thiam tawhten he kalphung hi an khawih thei lo; kalphung thar khawih turin party thar, mithar kan mamawh a ni,” Lalduhoma hian a ti.