Ram leh hnam humhalh turin intodelh a ngai a, chumi tur chuan thalai awm mai mai an awm loh a ngai tih Central YMA president Lalhmachhuana chuan a sawi.
YMA-in kumpuan atan ‘Ram leh Hnam Humhalh’ a hman zui leh turah hemia hma lak tul nia ama rilru a thawh dan The Aizawl Post zawhna chhangin Central YMA president thar chuan, intodelh chu ram leh hnam humhalhna tura pawimawh zingah a tel tih a sawi a. Thalai awm mai mai an awm loh a ngai a, lehkhathiam hna hmu lo te pawh awm loh a ngai a, mahni hmazawn theuhah thawh hreh nei loa kan hmuh ang ang thawh theihna turin skill development lamah tan lak a ngai tih a sawi.
“YMA ang chauh chuan a har a, sawrkar nen tangruala thalai tih tur hre lo zawkten an chak zawng tak an tih theih nan tan lak ho a ngai,” a ti.
Zofate ram luah chin chu engti zawng maha chan loh na tura venhim chu kan tih makmawh a ni tih a sawi bawk.
Ruihhlo a hluar zel chu hma lak a ngai a. A hlawm liana ruihhlo man tur tam ta lutuk chu ruihhlo hi kan thunun zo lo ta lek lek nia a lan thu te, supply reduction lamah hma lak chak leh a ngaih thu te, chutihrualin demand reduction leh a la ti ve lo te venhim – harm reduction lamah tan lak tel a ngaih tho thu Lalhmachhuana hian a sawi
“Kan ramah dan a lal tawk em aw, tih hi ngaihtuah theih a ni a. Dan hi sawrkarin chak zawka kengkawh turin YMA pawhin sawrkar thlawp that a ngai niin kan hria,” a ti a. Rule of law kenkawh that thar ngai a tih thu a sawi.
Ram leh hnam humhalh kalpui turin Central YMA chuan inkaihhruaina a siam anga, chumi ang chuan Sub Hqrs, Group leh Branch te tan tlan a ngaih piahlamah mipuiin an thlawp a duh tih a sawi a ni.
Ram leh hnam humhalh kawnga CYMA president-in tul a tih dang:
4Development hi enviroment tihchhiat a nih loh dan tur emaw, loh theih lohah chuan a tichhe tlem thei tur zawnga hma lak a ngai.
4Zohnahthlak raltlante tanpui piahlamah Zohnahthlak chenna ram a ralmuan leh theih dan tur leh an ram luah chin an luah zui theih dan tur ngaihtuah a ngai.
4Mizoramin zirna uar thar leh a tul a, ram leh hnam humhalh turin zirna a pawimawh. Quality education neih a ngai a, zirna kan kalpui danah tun aia quality zawk leh uluk zawka kalpui a tul.
4Ramri buai chungchangah sawrkar thlawp tlat chu NGO anga tih tur a ni. Kan ram kan chan loh nan theihtawp chhuah a, a venhim kawngah theihtawp chhuah a tul.