Site icon The Aizawl Post

Ram pathumin Palestinian state pawm

Norway, Ireland leh Spain te chuan Nilaini khan Palestinian state chu an pawmpui tur thu an puang a, Israel-in demna thu a sawi laiin Palestinian-te tan chuan lawmawm em em a ni thung. Israel chuan Norway leh Ireland-a ambassador te chu a ko haw nghal a ni.
Palestinian state official a pawmna chu May 28-ah puan a ni dawn a. Palestinian te tan chuan hun rei tak state hrana awma inrelbawlhran an ngiat tawhnaah lawmawm tak a ni.
Norway in pawmpui tur thu sawi hmasa berin Prime Minister Jonas Gahr Store chuan, “Kan pawm lo a nih chuan Middle East ah remna a awm thei dawn lo” tiin a sawi.
Irish Prime Minister Simon Harris pawhin Spain leh Norway te nena inbiakpawhna neia thutlukna siamho an nih thu sawiin ‘Ireland leh Palestine te tan ni chhinchhiahtlak a ni’ tiin a sawi a. An tum ber chu Israeli-Palestinian buaina chu two-state solution hmanga chinfel a ni.
Harris chuan khawvel ram dng te pawhin Norway, Spain leh Ireland chu thlawp zuiin Palestinian state a pian mai a beisei thu a sawi bawk.
Israel chuan chhanletna a siam nghalah Foreign Minister Israel Katz chuan Ireland leh Norway a Israel ambassador te chu Israel a let nghal turin a ti a.
“Ireland leh Norway te hian Palestinians leh khawvel pum message an pek chu : Firfiakna a hlawhtling tih a ni” tiin Katz chuan a sawi.
Palestinian state pawm chuan Gaza a Israel mitang mek te chhanchhuah tumna chu a tikhawtlai dawn tia sawiin a chhan chu ‘Jihadist of Hamas leh Iran te lawmman an pek avangin’ inkahhai awm theihna a tlahniam a ti bawk a.
Tun hnaiah European Union ram thahnem tak te chuan Middle East a remna leh muanna a awm theih nan two-state solution chu kawng awmchhun tiin Palestinian state an pawmpui tur thu an lo sawi tawh a. Palestinian state pawm ram an tam a nih chuan United Nations ah nasa zawka hmalak theih niin Israel kawmserhna chu a thuk tial tial thei bawk.
Norway chu European Union member a ni lo va, mahse, Israel leh Palestinians buaina chinfel nan chuan two-state solution a ngai ti rengtu a ni.
“Firfiakna kalpuitu Hamas leh militant group te hi two-state solution leh Israel state pawmlo tute an ni” tiin Norwegian government leader chuan a sawi a. “Palestine te hian independent state ni turin fundamental right an nei a ni” tiin Gahr Store chuna a sawi.
Norway cuan Palestine chu independent state ah pawmin chumi kaihhnawih engkim mai chu a pawmpui dawn a ni, tiin Gahr Store chuan a sawi.
Norway in Palestine state a pawmna hi kum 30 hnu kum 1993 a Oslo agreement ziah hnua thleng ani a. “Khata tang khan Palestinians te chuna two-state solution a hlawhtlin theih nan hma an la a ni” tiin Norwegian government chuan a tarlang.
Norway chuan World Bank pawhin Palestine te chuan state an nih thieh nan kum 2011 khan criteria pawimawh an paltlang vek a titawh tiin mipui tena service pawimawh an neih thieh nan national institution te pawh din a ni a ti bawk a.
“Gaza indona leh West Bank a illegal settlement zauh zel hian Palestine dinhmun chu kum sawm kalta ai khan a chhe tawh zawk tih a tilang a ni” tiin Norwegian sorkar thuchhuak chuan a tarlang bawk.
Palestinian statehood hi kum sawm tam khawvel ram tibuaitu a ni a. Kum 1988 khan Palestine Liberation Organisation (PLO) te Palestinians te aiawh ber chuan a tum khat nan State of Palestine din an puang a. Mahse, a ramri tur te engmah sawi nei lovin Jerusalem chu capital atan an puang bawk a ni.
A tak takah erawh Palestinians te chuan Palestinian Authority (PA) kaltlangin Israel-ocupied West Bank ah self-government limit tak an nei chauh thung a.
PA te chuan kum 2007 khan Hamas te lakah Gaza Strip an hloh tawh a UN chuan Gaza Strip leh West Bank chu single political entity angin a ngai a, Israel in a thunun mek a ni thung.
Israel sorkar chuan Palestinian statehood a pawm ve lo va, tuna Israeli sorkar lai mek pawhin West Bank leh Gaza a Palestinian state din chu an hnawl bur bawk a, din a nih chuan Israel tana pawi leh hlauhawm thei a ti.
US chuan Israel thiangah independent Palestinian state din a remti bawk a, chu chu two-state solution tia hriat lar leh Israel-Palestinian buaina tihrehna tura ngaih a ni a. Mahse, US chuan chu mi thleng tur chuan Israel leh Palestinian ten inbiakna neia an remtih tlan a ni tur ani a ti thung.
Ram pathum thutlukna siam chuan Israel a tithinrim hle a, Ireland leh Norway atanga ambassador a koh haw hnuah Spain atang pawhin a kohhaw nghal bawk a.
Chumai bakah Ireland, Spain leh Norway ambassador te chu ko bawkin sawihopuina a neih dawn thu leh 7 October a Israeli sipai hmeichhia rukbo a nih lai video an entir dawn a ti bawk a.
Israel foreign minister Israel Katz chuan, “history chuan Spain, Norway leh Ireland te chuan Hamas tualthattu leh pawngsualtu te, tleirawl hmeichhiate pawngsuala nausen te haltu te hnenah gold medal an hlan hi a hrereng tawh dawn a ni” a ti.
“An ambassador te chu kan koh ang a, chutah chuan hmeichhia an rukbo te an pawngsual dan rapthlak zet video entir an ni ang a, an sorkar thutlukna pawi dan an hre mai ang” a ti bawk a.
“Israel chuan ngawih a chuh dawn lo va, nghawng natak a awm ang” tiin Katz chuan a sawi bawk.

Exit mobile version