Ram pawn atanga Pro Fight tel tum thahnem
Zudio LPS Pro Fight champion nih tumin boxer 322 zetin entry form an thehlut a, October ni 28 khian LPS Arena, Falkland-ah inbukin, tel tur zat dik tak hriat theih a ni ang. Tun thlengin state pawn atangin boxer 10 chuangin tel an tum.
September ni 23 atangin LPS Office, Zarkawtah tel tumte’n lehkha thehlut tanin, Inrinni thleng khan hun hawn a ni a, weight lian pahnihah boxer 65-in form an thehlut a, a rit ber middle-ah 23 niin an tlem ber a, weight te pathum – fly, bantam leh light-ah tel tumin boxer 257-in an inpelut a ni.
State thenawm Lamka, Manipur atangin boxer pasarih, Meghalaya atangin pali, Assam leh Myanmar atangin boxer pakhat ve vein lehkha an thehlut a; Mizoram pawn atangin boxer 10 chuangin tel an tum a ni.
October ni 28, Thawhtanni zing dar 8 atanga chhun dar 12 thlengin LPS Arena, Falkland-ah an hriselna endik hmasain an inbuk dawn a, hemi hnu hian tel tur zat dik tak a hriat dawn a, October ni 31-ah LPS Office-ah fixture tarchhuah a ni ang.
Nikum khan weight hrang pangaah boxer 281 an tel a, tun tumah hian title fight-ah bantam champion Laldinsanga, welter champion Lalruatzela Hauzel leh middle champion C. Lalhruaitluangate’n anmahni cho thei tur an lo nghak dawn a, title humhim turin fly champion lai NT Lalbiakkima dinhmun a chiang lo ve thung a, HC Lalramfela’n lightweight title kalsanin a tir atangin welterweight title a chuh dawn bawk a ni.
November ni 1, Zirtawpni zanah LPS Arena-ah tanin, December kar khatna thleng a awh dawn a; weight hrang pangaah lawmman Rs. 6,50,00 semchhuah a nih dawn bakah KT Enterprise-in boxer, referee leh judge tithate chawimawina tumsakin, GIG Motors-in fighter of the night lawmman a tum dawn bawk a ni.
Pro Fight hnuhnung vawingaah Tata commercial vehicle dealer Zothan Autoworks-in title sponsor vawili changin, tun tumah an hnuaia dawr thar an hawn tur, tunlaia India rama thang chak tak, thawmhnaw man tlawm zawrhna Zudio hmingchawiin championship buatsaih a ni ang.
D3 Business Enterprise, RS Traders Third Eye Solution, Thansanga and Sons Auto Division Yamaha Racing, Orient Goldsmith, Kuriz Colection leh Wurfel-te’n an sponsor bawk.