Daily Newspaper

Ram pawn atanga vawk lak duh an awm leh tawh – Vety minister

62

Vawk vulh bul tan that leh tumnaah ram pawn atanga vawk lakluh duh an awm leh tawh tih AH & Vety minister Dr K Beichhua chuan a sawi a. Sawrkar chuan tul leh him a tih hunah vawk hi a lalut mai dawn tih a sawi a ni.

AH& Vety minister hian kumin March-a Mizorama vawk pul hri – African Swine Fever (ASF) hmuh chhuah tanna khua Lungsen, Lunglei district chu Nilaini khan a tlawh a, vawk hrileng avanga khawtlangin harsatna hrang hrang an tawhte khawtlang hruaitute nen an sawiho.

Minister chuan Zoram mipui tana sawrkarin hmachhawp a neihte chak taka bawhzuia kal an tum mek laiin, beisei loh lam atangin harsatna hrang hrang a rawn thleng a, heng karah hian hmalam panin ke an pen zel dawn, tiin a sawi.

Covid-19 hrileng, vawk pul hrileng, Assam nen ramri buai leh Myanmar lama kan unauten harsatna tawka Mizorama an lo luh meknaah, heng harsatna kara Zorama rorel turin Pathianin MNF a ruat tih a pawm nghet tlat tih Dr K Beichhua hian a sawi a. Vawk pul hrileng chungchangah Lungsen mipui dinhmun a hriatthiampui thu leh zangnadawmna pe thei turin sawrkar laipuiah theihtawp chhuahin an beih mek thu a sawi bawk.

Vawk vulh bul tan that leh chungchangah rampawn atanga lakluh duh an awm leh tawh tih sawiin, “Sawrkar hian kan ram mipui tana tha ber tur a ngaihtuah thin a, mithiamten a him tawh e, an tih hunah chuan a tul angin mipui tan department pawhin vawk no tha chu a lalut thei,” a ti. Vawk vulhtute sawrkar thu ngaichang turin a ngen.

Social Welfare minister ni bawk Dr K Beichhua hian Social Welfare Department kaltlanga Lungsena Eklavya Model Residential School din tumah landlease chu sawrkar laipuiin VC pass a remtih loh avangin Land Revenue department-ah lehkha a kal mek a, tihfel a nih hunah hna pawh tan theih thuai a beisei tih a sawi.

Lungsenah hian Dr K Beichhua chuan EMRS sakna hmun tur chu official-te hruaiin a hmunah a enfiah nghal a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy