Innovation in Science Pursuit for Inspired Research (INSPIRE) Scheme kaltlanga October 9-11 chhunga buatsaih 10th National Level Exhibition & Project Competition, New Delhi-a neihah Mizoram aiawha tel zinga zirlai naupang pahnihten INSPIRE Awards MANAK (Million Minds Augmenting National Aspirations and Knowledge) chawimawina an dawng.
INSPIRE Awards MANAK hi sawrkar laipui Department of Science & Technology flagship programme zing ami a ni a, kum 2009 atang khan kalpui tan a ni. Class 6-10 zirlai, kum 10-15 chin tana ruahman niin, state huap intihsiak neih hmasak phawt a ni a, heta tithate hi ram pum huap inelnaah an tel thin a ni.
Tun tuma ram pum huap inelna neih zawh takah hian India ram atangin zirlai 441 an tel a, chu’ng atang chuan a titha zual 60 chu National INSPIRE Awards MANAK chawimawina pek an ni. He inelnaa Mizo zirlai telte atangin John Lalhruaitluanga, Sacred Heart School Lunglei leh Lalhmingsangi, JNV Khawzawl chuan chawimawi hi an dawng a. An ni pahnih hi National Innovation Foundation-in an model/ exhibit-te chu a taka siam chhuak tur leh patent turin an bawhzui sak dawn a ni.
Heng bakah hian national awardees ho tan hian SAKURA Programme buatsaih thin a ni a. Japan ramah naupangte hian chawlhkar khat hun an han hmang thin a ni.
Intihsiaknaah hian Mizo zirlai pathum an tel a. Award dawng pahnih bakah hian K Darthangmawia, Kids Care School Aizawl a tel bawk. Zirlaite hi SCERT deputy director F Lalliansanga leh NIF state coordinator Lalbiakzuala ten an tawiawm a ni.
Ram pum huap intihsiakah Mizo zirlai 2-in award dawng
