Ram pum huap intihsiaknaah
Mizoram aiawh thalai tel dawn
January 11 & 12 a New Delhi-a Viksit Bharat Young Leaders Dialogue 2025 neiha tel tur Mizoram team chu Nilaini khan Youth Services minister Lalnghinglova Hmar office-ah thlah an ni a. India rama thalai thlanchhuahte mithiamte leh sawrkar laipui hotute hmaa inlanin topic hrang hrang thlan bik 10 atanga India-in hmasawnna rahbi kai a tum meka ke a pen theih dan tur an sawi dawn a ni.
He huna tel turte hi 2023 November atang tawh khan stage one atan online quiz neih a ni a. Hemi hnuah stage two atan essay competition neih leh niin, stage three atan state level PPT presentation hmangin an inel leh a, hetah hian final stage-a tel turte thlan niin Mizoram team-ah hian mi 12 thlan chhuah an ni.
Youth Services minister chuan kal chhuak turte chu Delhi-ah inelna hmachhawn turin an kal tih chu rilrua dah reng a, an kal chhanah insawrbing turin a chah. “Ram aiawh theih na hun remchang hi tu tan pawha thleng fo a ni loa, in inbuatsaih tawhna piahlamah theihtawpa inbuatsaih ang che u,” a ti.
Mizoram team hi theme palia inel turin team li-ah then an ni a. An inelna turte hi – Tech for Viksit Bharat; Enhancing Productivity in Agriculture; Empowering Youth for Viksit Bharat leh Empowering Women and Improving Social Indicators – te a ni. Govt. Hrangbana College associate professor pahnih – Dr Rosaline Varsangzuali leh Dr H Lalzuithangi ten an hruai dawn a ni.
Ram pum huap intihsiaknaah Mizoram aiawh thalai tel dawn
