HSSLC exam result-a zirlai titha zualte lawmpuina hun Mizo Students Union Gen. Hqrs-in a buatsaih hmanpuitu minister K.Lalrinliana chuan zirlaite chu ‘Mizoram tan eng nge ka tih theih ang’ tih rilru pu chunga lehkha zir sauh sauh turin a fuih a.
USA president JF Kennedy-a thusawi, “I ramin a tihsak theih che aiin i ram tan eng nge i tih theih ngaihtuah zawk rawh” (Ask not what your country can do for you – ask what you can do for your country) tih kha khawvela thusawi ropui leh lar zinga tel a ni a. JF Kennedy-a’n he thu a sawi (1961) hma daih khan, Mizo tlangval, state danga lehkha zira awm, kum 30 mi nia 1940-a chatuan ram pan ta, hnam veitu Kaphleia khan hetiang thu hi a lo sawi daih tawh a. (Ka ram leh hnam tan engmah tih tum lovin, hnahthel ro ang maiin ka tla mai mai dawn em ni?) Natna khirh tak a vei hnu pawh khan Zofate tan thuziak tha leh hlu tak tak a la hnutchhiah hram a. Kaphleia kha ram leh hnam veitu ‘nationalist’ a ni, kan ti thei ang.
Tun laia zirlaite hi, minister-in a sawi angin, an vannei hle mai a, tunlai thiamna hrang hrang leh material kimchang tak hmangin lehkha an zir thei a, tunhmaa rual u zawkte lehkha zir hun lai nena khaikhin chuan lei leh van ang maia inthlau a ni tawh. Ram tan eng nge ka tih ve theih tih zawhna pai ru ran chunga lehkha an zir phawt chuan, tunlaia kan zirlaite thluak hian hnamdangte thluak a phak lohna bik a awm lo; tuna kan la thuanawp deuh chhan hi chu thahnemngaihna tak tak a la tel loh vang mai niin a lang.
Zirlaite hi kan han fuih viau thin mai pawh a, zir zo tawh, Mizoram tana thawk mek tuna kan sawrkar hnathawkho pawh hian, minister fuihna thu hi anmahniah kai lut thei se a duhawm hle. Mizoram hmasawnna leh thuanawpna hi sawrkar hnathawk, line hrang hranga thiamna bik neite mawhphurhnaah hian a innghat thui hle. Sawrkar hnathawkte hian tun ai hian ram hi han vei ngat sela chuan, mihring tlemte awmna ram zimte hi model state-ah kan chhuah thei deuhthawin a rinawm tlat a ni.
Ram tan eng nge ka tih theih?
