Daily Newspaper

Ram Temple sakna tur lungphum PM Modi-a’n phum

10

Babri Masjid chhutchhiat a nih hnu kum 28 naah Ayodhya-ah Ram temple sakna tur lungphum phum a ni ta a. PM Modi leh RSS chief Mohan Bhagwat te chu bhoomi pujan ceremony Ayodhya a neihnaa stage a mi panga chauh awm zingah an tel a, sawmbik mi 170 an tel bawk a ni.

Prime Minister Narendra Modi chuan thusawina a neih hmain Lord Ram leh “Jai Siya Ram” tiin a au hmasa phawt a.

“Vawiina a lawmna leh hnehna hi Ayodhya chauh ni lo khawvel pum tan a ni. Ram zuitute khawvel hmun tina mite ka lawmpui a ni,” tiin a sawi.

“Shri Ram janma Bhoomi Teertha Trust tena he event tel ve tura min sawm hi ka vannei hle a. Ka lawm em em a ni,” tiin a sawi bawk a.

“Vawiinah India-in golden chapter a siam a. Vawiin hian ram pum chu Ram-in a chiah a ni. Vawiin hian ram pumin an vei a, a chhan chu kum za tel nghah tawpna nih vang a ni. Mi vaibelchhe tel te chuan vawiina thilthleng hi an awih lo mai thei hial a. Kum tam tak Ram Lalla, puan In hnuaia awm chuan Temple ropui a hmu tawh dawn a ni,” tiin a sawi bawk.

Prime Minister Narendra Modi chuan thusawina a neih hmain Ram Temple sakna tur lungphum a phum hmasa phawt a. Hei bakah hian hriatrenga postage stamp ‘Shree Ram Janmabhoomi Mandir’ chu a tlangzarh bawk.

August 15-in zalenna kan nei ta tih a lantir angin vawiinah hian Ram Mandir atana inbeihna kum za tel chu a tawp ta a ni, tiin PM Modi chuan a sawi bawk a.

Mi vaibelchhe 130 aiawhin Ram Janmabhoomi movement a lo tel tawh tin te zahna chibai ka buk che u a, tia sawi bawkin, “Eng pawh ti dawn ila Ramji lam kan hawi thin. Lord Ram identity tichhe tura beihna a awm chungin kan thinlungah lal a ni zel a ni,” tia sawiin temple chu national sentiment leh collective faith symbol a nih tur thu a sawi bawk.

Temple sak zawh a nih hnu chuan Ayodhya chuan pawimawhna a neih tawh dawn piahah a economy a inthlak vek tawh dawn a, khawvel hmun tin atangin mipui an lo pungkhawm tawh dawn, tiin PM Modi chuan a sawi bawk.

Society tin Dalits leh tribal te tel veka zalenna sual laia Gandhi an thlawp ang khan society section tin ten Ram temple an thlawp a ni.

Ram chu India hnam leh mi chi hrang hrang te thuikhawmtu tia sawiin Ram leh Ramayan chu tawng hrang hranga Tamil, Telegu, Odiya, Bengali, Kashmiri, Malayalam etc a an kohdan a sawi bawk a.

“Muslim mipui tamna ber Indonesia-ah chuan Ramayan an nei a. Lord Ram chu biak a la ni zel a ni,” tia sawiin Cambodia, Thailand leh Malaysia a Ramayan tradition hrang hrang a sawi a, Ramayan chungchang chu Iran leh China-ah pawh sawi a nih thu a sawi bawk.

Ram temple chu India huna hmahruaitu a nih tur thu sawi bawkin, “Kan scripture chuan Lord Ram anga roreltu an la awm lo a ti a. Lord Ram policy chu vanram aiin motherland a lian zawk tih a ni a. Lord Ram policy hi ram thiltihtheihna chu a ni a, inremtlang taka nunhona a ni bawk a. Inunauna leh inthianthatna he temple brick hmang hian kan din tur a ni a. Mitin te rilru puthmang kan zah tur a ni” tiin a sawi bawk.

Nimina Ram temple lungphum phumnaah hian Hindu puithiam thlanbik te bakah mi pawimawh tlemte te chauh sawm an ni.

Ram Temple design thlak hlek
Ayodhya a Ram Temple sak tur chu a tira ruahmanna aiin a let ngain a lian zawk dawn niin architect chuan a sawi.

He temple hi Nagara style a sak tur a ni dawn a, a tira inchung mum (dome) pahnih nei tur kha mi tam zawk an len theih nan pangaah tihpun a nih thu architect chuan a sawi a.

Ram Temple hi kum thum chhunga sak zawh fel hman vek tum a ni bawk a. Temple sak enkawl tura din Shri Ram Janmabhoomi Teertha Kshetra te chuan an kalpui dawn a ni.

“Supreme Court-in thutlukna a siam hnuah temple design chu siam danglam a ni a. Tunah chuan a tira ruahman aiin a let ngain a lin tawh zawk ang,” tiin a design tu architect Chandrakant Sompura chuan a sawi.

“Pindan ril chungah tower a nei tawh bawk ang a, dome pahnih aiah panga a nei ang. Temple an zawng pawh hi a tira ruahmanna aiin a sang tawh bawk ang,” tiin a sawi bawk.

Architect Sompura hi kum 77-a upa ni tawhin temple architects family niin 200 vel an lo design tawh a. Ram Temple tur hi Vishva Hindu Parishad (VHP) leader thi tawh Ashok Singhal an kum 30 kalta vel khan design tura a ngen anga ti a nih thu a sawi.

Kum 30 kalta vel kha chuan Ram Temple design chu a khirh thu sawiin a ke pen chu unit of measurement-ah a hman thin thu a sawi bawk a.

“Kum 1990 a Ayodhya ka tlawh hmasak ber tum chuan security thil avangin engmah measurement unit tak ngial pawh ken luh phalloh a nih avangin ka ke penin ka teh a ni,” tiin Sompura chuan a sawi bawk.

Dome panga dah tura thutlukna siam a nih chhan sawiin, “Temple tan hmun a tam tawh a, pahnihna chu publicity a nasat avangin temple tlawhtu an tam rin vangin len tam theih nan a ni,” tiin a sawi bawk.

Sompura chuan a fapa Ashish chuan revised plan an siam chu June thlaah trust hnenah a thehlut a, an pawm zui nghal thu a sawi a. Ashish Sompura hian temple sak chu a enkawl ang a, mahse, a pa zawk chuan thutlukna a siam thung zel ang.

Temple tam tak a design tawh thu sawiin a pu tana Somnath temple a special bik ang bawkin a tan chuan Ayodhya-a Temple chu a special bik thu a sawi bawk. A pu Prabhashankar Sompura khan Somnath temple a design bakah a sak hna a enkawl vek a ni.

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy