awrkar laipui ruahmanna, India thil siam chawilarna leh ramchhung mite intodelhna atana tangkai tur nia ngaih, ram chhung mite thil siam zawrhna hmunpui PM Ekta Mall chu Aizawlah pawh sak a ni dawn a, Inrinnni khan chief minister Lalduhoma’n a lungphum a phum.
PM Ekta Mall hi kum 2023- 2024 SASCI part 6 hmanga sawrkar laipuiin a ruahman a ni a. Ram chhunga thilsiam pho chhuahna hmunpui, international market hawlh phaka ramchhung mite kutchhuak zawrhna tur ni. Mizoram Ekta Mall-ah hian state hrang hrangin stall an rawn nei anga, Mizoram pawhin state hrang hrang Ekta Mall-ah stall a nei ang. One District One Products, geographical indication product leh thiamhnang thil siam thehlarna leh zawrh chhuahna hmunpui a nih dawn avangin, Mizorama district tinin stall an nei anga, state leh UT ho stall tur 36 leh district tin stall tur 11, a vaiin stall 47 tal a awm dawn a ni. Food court, restaurant, naupang infiamna hmun bik, gaming arcade, meeting hall, movie theatre, retail Kiosks leh thildang tam tak a awm bawk ang.
Aizawl Chawnpui Vengah sak tum a ni a, a hmun hi Printing & Stationery department ram thin a ni a, General Administration Department kutah a lut tawh a, GAD hian mall sakna atan hian a hlan ve leh a ni. Chief minister sawi danin, state 27 hnenah project cost pek zat a inang vek loa, Mizoram chu cheng vaibelchhe 127 pek kan ni. A sum hi vbch. 63.5 an dawng tawh a, a lung an phum h chuan an sa zui mai dawn a. An sak zawh hunah chuan thalai 220 tan hna thar a siam thei tura ngaih a ni.
A sa turin sawrkar laipui Ministry of Health & Family Welfare hnuaia public sector undertaking lar – HLL Infra Tech Services (HITES) ruat an ni a. Hetiang sak lama sulhnu nei tha leh rintlak nia sawi niin, Aizawl RIPANS pawh an sa mek a, Mizoram sik leh sa dinhmun leh harsatna an tawh theih dang hre sa an nih avangin tha tura beisei sa an ni.
“Mizote hi kan pi leh pute atang tawha kutthemthiam thil lama sang tak kan ni a. Nimahse, kan dehchhuah thil kalsanin, hnam dang amite dehchhuah thil kan hmang nasa hle. Kan kutthemthiam thil tam tak chu an thi thawthang tawh a. Kan uar tharleh a, thil siamchhuah lama tan kan lak a ngai,” chief minister hian a ti.
Bel vuak (pottery), thiamhnang deh, puantah leh la deh, lo leh huan enkawlna hmanraw chher leh siam, ei tur lam chi leh inchhung sekrek bungruaah Mizopa kutchhuak hi state hrang hrang amiten lei ve chur chur mai se tih chu an duhthusam a ni tih a sawi a. State tina ‘India in one Mall’ kan sa thluah dawn a, ‘Make in India’ chawilarna a ni nghal dawn tih a sawi a ni.
“Tunhnaiah New Delhi-a HITES hotute nen kan inkawm a, sawrkar duh dan ka hrilh a. Hna tha an duh a, chak taka thawh a, chhawr tangkai thuai thuai an duh. Revised estimate ngai loa thawh zawh ngei tum tur a ni, tiin ka hriattir a ni,” a ti. Project management unit turin IIFCL thlan an ni tih a sawi bawk.
PM Ekta Mall sakna sawrkarin ram a pek avangte, Aizawl Municipal Corporation-in project a kal chak theihnan special permit pe in a thawhpui tha a. Power & Electricity department-in an dil apiang tihsakin, electric ban pawh an sawnsak hial, tiin, mimal leh Chawnpui khawtlang he mall sakna atana tha thawhtute zawng zawng chungah an lawm hle tih chief minister hian a sawi a ni.
Ramchhung thil siam zawrhna Mall sa dawn
