Tunhnaia Mizorama nungchate zirchianna kalzelah Mizoram University Department of Zoology-a Prof. HT Lalremsanga leh a hote chuan Ramdaidep – Cyrtodactylus (Bent-toed Gecko) species thar hmuchhuakin a hmingah an chenna hmun leh khua, Vairengte hmingchawiin ‘Cyrtodactylus vairengtensis’ tiin an phuah.
Nungcha hmuhchhuah thar chungchang hi 2023 November 13 khan international scientific megajournal, Zootaxa vol. 5369 (4): 553–575 chuan a tlangzarh (published) a ni.
Cyrtodactylus-te hi khawvel pumhuapah species 354 leh India hmarchhakah species 21 hmuhchhuah ni tawhin, mihring chenna bul, dai, rampalaileng leh ramhnuaia hmun biru lai, leikua, lungkar, thingkawrawng leh hnim zingah an khawsa thin. Zan thim hnuaia chaw zawnga vakchhuak chi (nocturnal) an nih avangin hmuh zen zen tura awm lo chi an ni.
Hei vang hian tunhnaiah ngunthluk zawka zawn leh zirchian an nih atangin species thar hmuhchhuah belh zel an ni a, an biology pawh hriat tur a la tlem hle tih sawi a ni. Tun ami, Cyrtodactylus vairengtensis hi a pianhmang leh DNA an zirchianna atangin kum 2021-a Mizoram atanga species thar hmuhchhuah tawh ‘Cyrtodactylus aaronbraueri’ nen an la inhnaih ber a ni.
“Hetia Mizorama nungcha chi thar hmuhchhuah belh a la ni zel hian kan ram hi biodiversity-a a hausak zia a tihchian bakah nasa lehzuala an hlutna hriaa kan humhalh a pawimawh takzet a ni,” Prof. HT Lalremsanga hian a ti.
Ramdaidep chi thar hmuchhuak
