Parliament Monsoon Session neih mekah Mizoram Rajya Sabha MP K Vanlalvena chuan ‘Zero Hour’ ah thu sawiin, ram pawn atanga kuhva rah leh sawhthing lakluh tih tawp a phut.
India hmarchhaka kuthnathawktuten an thlai thar – kuhva leh sawhthing hralhnaah harsatna an tawk tih sawiin, thenawm ram dang atanga heng thlai hi India rama lakluh vang a ni tih MP hian a sawi a. Hmarchhak mipui tam tak ei leh bara an inghahna chu kuhva leh sawhthing a ni, tiin, Myanmar atanga dan loa kuhva ro tamtak Mizoram leh Manipur kaltlanga lakluh a nih thu a sawi a ni.
India ram leh Myanmar ramri ah India sawrkarin Customs leh Assam Rifles a duty tir chungin, ramri kaltlangin smuggler-ten kuhva ro tam tak an lalut a. Hmarchhak mipui tam tak rin dan chuan, heng smuggler-te leh sawrkar mi rawihte tangrualin, sawrkar phal loh kuhva ro tamtak hi ramri kanin an lalut nia an rin thu a sawi bawk.
Hei bakah hian, sawrkar laipui chuan China atangin sawhthing tam tak a chawlut tih K Vanlalvena hian House-ah a sawi a. Tul lo taka ram dang atanga sawhthing leh kuhva rah lakluh hian hmarchhaka kuthnathawktute eizawnna a tih chhiat avangin tih tawp thuai a phut tih a sawi a ni.
Ramdang atanga kuhva rah leh sawhthing lakluh tihtawp ngen
