Environment Forest & CC department, Department of Botany leh Eco-Club Govt. Serchhip College tangho buatsaihin Ningani khan ‘Seminar in Observance of International Day of Forests’ hman a ni.
IPVM (Indira Priyadarshini Vriksha Mitra Awards) national awardee Rongura Hrahsel, MFS (Rtd) chuan zirtirna a pe a. Mizorama kan leilung hausakna hlu ber chu ramngaw, nungcha leh biodiversity an ni, tiin, heng rohlu duat nachang kan hriat loh avangin kan tuar mek tih a sawi. Tui harsatna kan tawk chho a, hei hi mitinin kan vei a, ramngaw neihsa humhalh bakah ramngaw siam belh a pawimawh tih a sawi a. Loh theih loha ramngaw chu thil danga kan hmang duh a nih pawhin renchem taka kan hman a tul tih a sawi a ni.
Wildlife Protection Act 1972 chungchangah Mizoramah nungchate chenna ramngaw a chereu nasat avang leh mihringten kan tihhlum nasat avangin an tlem tawh hle a, nasa zawka kan humhalh a pawimawh tih a sawi bawk.
“Mizoram biodiversity chu state pawnlam miten an hria in an hlut a; zirbingna leh thiamna sang zawk neih nan an hmang nasa a. Mizoram mipui zawkin hlutna chang hre loin kumtin kan tikang a, silai, bomb leh tur hmanga tichereu in a sa kan ei bawk a. A pawiin hemi kawngah hian hma sawn kan ngai a ni,” Rongura Hrahsel hian a ti.
Seminar-ah hian Govt Serchhip College zirlai leh zirtirtute, Thenzawl Forest Division staff-te bakah, New Serchhip leh Chhiahtlang Village Forest Development Committee atangin mi engemawzat an tel.
Ramngaw humhalh a tul chhan inhrilh
