Daily Newspaper

Ramri-ah Assam leh Mizoram Police inkap

227

Ramri-ah Assam leh Mizoram Police inkap

Mizorama buaina an rawn siam hi ka dem – HM

Aizawl, July 27 : Assam lamin Mizorama buaina a siam reng hnu ah July 26 khan Mizoram chhungah Assam Police engemawzat lutin Mizoram Police awmna camp chu an hneh chhuh a; hemi hnua inepna kal zelah state police pahnih hi an inkap zui ta a ni. Mizoram Home minister Lalchamliana chuan Mizoram chhunga Assam sawrkarin buaina a rawn siam chu na takin a dem tih a sawi.

The Aizawl Post thudawn danin, Thawhtanni khan Assam Police engemawzat chuan Vairengte dai Mizoram chhunga Mizoram IR Police outpost leh Mizoram lama paramilitary force awmna kalpelin Mizoram chhunga IR Police camp an luhchhuah a, IR police hi 10 vel chauh an awm avangin an tam hneh a, an nawrchhuak a, an luah zui ta a ni.

Hemi hnu hian Vairengte khawtlang chu inpunin helai camp hi an thleng thla a, Assam Police lam hian tiang nena an lo nawrlet hnuah Mizoram Police tam vak lo nen an innawr leh a, an intamhleih avangin an nawr hneh meuh loa, an chawlh lailawk hnu ah police leh civil mi inawmpawlh chuan an nawr zui leh a, Assam Police lam hi a tam zawk chu an hnungtawlh zui mek laiin, tear gas an kap a, silai an hmehpuah zui avangin Vairengte mipui lam hi an tlanchhia a, hliam pawh an awm a ni.

Hemi hnu hian Mizoram Police lamin thupek an dawn angin mipui lam hi insaseng turin an hrilh a, a hnuah silai a puak zui ta niin thu dawn a ni.

Thudawn danin, Mizoram police lamah hian hliam an awm a, civil mi pawh hliam an awm. Assam Police lam hi state police pahnih inkah hnuah hian mi 5 an thi a, Assam lam civil mi pakhat a thi nia thu dawn a ni bawk. July 26 tlai la la khan Assam Police-ten an hnehchhuh Mizoram IR camp hi laklet leh nghal a ni tih thu dawn a ni bawk.

Kolasib bawrhsap Dr H Lalthlangliana chuan Vairengte IR post atanga tawlh lo tur hian ruahmanna hrang hrang siam a nih tawh thu leh engpawh thleng thei a nih avangin, inpuahchahna pawh felfai tak a kalpui a nih thu a sawi a Ambulance leh Medical Team-te pawh ruatfel tawh niin, thu belhchian dawl lo thehdarh a nih loh nan leh Mizoram Police-te chetlak tithuanawp thei zawnga social media hmang lo turin mitin fimkhur turin a chah a ni.

Mizoram Home minister Lalchamliana chuan thuchhuah siamin, Assam IGP kaihhruaina hnuaiah Cachar DC, Cachar SP, Cachar DFO leh Assam armed Police 200 rual vel chu July 26 chawhma dar 11:30 khan Vairengte Auto-Rickshaw stand-ah an lo lut a. CRPF-ten an ven lai duty post chu tihluihnaa rawn paltlangin Mizoram Police tam vak loin an ven mek pawh an kalpel a. Assam Police-te hian Lailapur lam atanga Vairengte pana National Highway-a tlan lirthei engemawzat an tichhe bawk.

Assam Police-ten buaina an siam tih hriat a nih veleh Vairengte khaw mipuite chuan thil awmzia hrechiang turin thil thlenna hmun an pan a. Ralthuam kenglo civil mite hi Assam Police chuan tiang (lathi) nena beiin tear gas-in an kap bawk a, civil mi engemawzatin hliam an tuar a ni.

Kolasib SP leh executive magistrate-te pawh rang takin buaina thlenna hmun an thleng zui nghal a. Harsatna chinfel tuma an hmalakna chu Assam lam police leh official dangte hian pawisa loin dawhkan kilin engmah sawipui theih an ni lo, a ti. Buaina hi a punlun zel a. Assam hian tear gas mai duh tawk loin grenade hial an chelek zui ta a, Assam police hian tlai dar 4:50 velah silai an hmet puak tan ta niin a sawi.

Assam lamin silai an hmehpuah tak avangin civil mite chhan nan Mizoram Police pawhin silai an hmetpuak zui ve nghal a. Hetihlai hian Kolasib SP pawh CRPF duty camp-ah Assam Police hotute nen an indawr mek lai a ni nghe nghe niin a sawi. “Assam police-in CRPF leh Mizoram Police duty-te zahpahna nei loa paltlang luiin Mizoram chhung ngeiah Vairengte Auto-Rickshaw stand hial an rawn lut ta mai hian nunaute a tithlabarin, boruak nasa takin a tichhia a. He thil thleng hi a pawi takzet a ni,” a ti.

Union Home minister chuan Assam leh Mizoram chief minister ve ve te a biak hnuah Assam police-te hi an tawlhkir ta chauh a, CRPF mi leh sate hnenah an duty post pawh an hlankir leh ta tih Home minister hian sawiin, “Mizoram chhungah dan loa Assam sawrkarin buaina a siam ta mai hi Mizoram sawrkar chuan na takin a dem a. He buaina pumpelh theih a nih reng laia hetianga Assam lamin buaina nasa tak an rawn siam avanga hliam tuar an awm hi Mizoram sawrkar chuan pawi a ti takzet a. Tun hnuah hetiang thil hi thleng tawh lo se a duh hle a ni,” a ti.

Mizoram sawrkar chuan Assam leh Mizoram inkar ramri buai hi muanawm takin, dawhkan kila chinfel thuai a nih a beisei a. Boruak tha tak hnuaia inbiakna a awm leh theih nan Mizoram sawrkar chuan Assam sawrkar pawh a tih tur tha taka ti turin a beisei tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy