Bangladesh ramri bul Mizoram chinah electric eng la luh lohna khaw 8 a awm tih Power & Electricity minister R Lalzirliana chuan a sawi.
Assembly Session-ah Tuichawng bialtu MLA Dr BD Chakma chu Indo- Bangla border bulhnaiah electric eng la nei lo khaw 10 aia tam an awm a, eng pawhluh a nih theihna’n sawrkarin hma lak a tum em, tih a zawt.
P&E minister hian electric eng la nei lo hi khaw 8 zawk nia sawiin, heng zinga khaw 5 hi electric eng la thlunluh loh hrim hrim na khua a ni tih a sawi a. Thingtlang khaw tina electric eng pe tura detailed project report siam a nih laiin, heng khuate hi ‘khua’ tih zinga chhiar theih tur ‘census village’ an la nih loh vang a ni tih a sawi.
Khaw dang, tuna electric eng nei lo te erawh electric current thlunluh tawhna, tuna nei leh ta rih lo an ni tih sawiin, leimin leh thlipui avanga a hrui chhia te, a kawng thui tham lutuk vanga chhia te, a hrui ruk bo avanga la siamthat chhunzawm hleihtheih loh te an ni tih a sawi a ni.
Hetihlai hian kum 2018-a Tripura atanga anmahni duhthua Mizorama awm tura hruaikir Bru-te chenna, Tlabung Village Council huamchhunga Dinthar khuaah an awm atanga tun thlengin electric reng pawhluh ala ni lo tih thu dawn a ni bawk.
Bru chhungkaw 70 vel chen mekna Dintharah hian anmahni remchan ang angin eng chhit tur ngaihtuah ve mah se, an mamawh khawp a phuhru zo lo hle tih an sawi a. P&E department lam chuan he khuaa kawlphetha lakluhna tura tih tur tul zualpui chu an zo thawkhat a, sum sen ngai zat tur an chhutfel hnu ah sawrkar lamah an thehlut tawh a, sum sanction a awm tak rih loh avangin hma lak zui ngaihna an hre lo tih an sawi a ni.
Ramri bul khaw 8-ah electric lut lo
![](https://theaizawlpost.org/wp-content/uploads/tap_logo-min-large.jpg)