Daily Newspaper

Ramri chingfel ngam lote hluihlawn hun tawhah ngai

20

Ramri chingfel thei tura sawrkarna fawng vuan si a, hma la ngam lo political party chu hluihlawn a, museum-a dah an hun tawh tih People’s Conference party hruaitu Vanlalruata chuan a sawi.

PC senior vice president Vanlalruata hian ramri chungchangah thuchah a siam a. Assam, Manipur leh Tripura te nena kan ramri a fel loh rualin, Assam-in kan ram zau tak a la enkawl avangin an ni nen hian ramri hi a fel lo zual tih sawiin, “Hemi chingfel tura remchanna neia sawrkarna fawng chelh reng si, hma la ngam si lo political party kan neihte hi museum-a dah a hun tawh,” a ti.

Assam-in Mizoram a luah laklet tuma Pu Ch. Chhunga kaihhruai Mizo Union sawrkarin hmalakna engemawchen a lo neih tawh fakin, ‘Brig T Sailo kaihhruai PC sawrkar phei kha Assam pawhin hnial ngaihna a hriat loh khawpa tanfung tha leh hmalakna chak tak a lo kalpui thu leh, hei hi 1986 Peace Accord-ah pawh hmawr bawkna remchang tak awm theih lai a nih nghe nghe thu a sawi. “Chinfel a ni ta mai lo kha a pawi em em a; hetih rual hian a hnua sawrkar kan neih Congress party kaihhruai leh MNF party kaihhruai phei hi chuan hmalakna tak tak an nei lo ve ve a. Tuna kan dinhmunah hian kan awm phah ta a ni,” a ti.

British-in India a awp hnu khan inner line siam niin, chu chu Mizote ramri a nih thu te; British ho duhamin ramri rawn pelin kan ramah kawngpui siam an tum avanga buaina kal zelah, kan ram pumpui min laksakin an thuhnuaiah min dah tak thu te Vanlalruata hian a sawi. Hun kal zelah British sawrkar te, British-India sawrkar leh Assam sawrkar pawhin Mizoram ngeia a pawm – Inner Line Reserved Forest zau tak chu Assam-in enkawl ta zelin, hei hi kan ram a nih avangin laklet ngei chu Mizoten kan tihtur leh mawhphurhna, min thlahtute laka kan bat a ni tih a sawi.

”Kan ram pawh chhan ngam lo political party-te thuneihna pek zui tawh loh hi kan tih turah PC party chuan kan ngai a. Assam-in kan ram a enkawl zawng zawng laklet hi keini party chuan kan ngam a, a tihdan tur pawh hre ngeiah kan inngai. Kan ram, kan hnam, kan sakhaw himna atana hma la ngam sawrkar siam ngei tura inbuatsaih turin Zoram mipui ka sawm a ni,’ PC senior vice president hian a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy