ZD Lalvunga
Kan ramri chungchang hian, mipui thinlungah ril takin hmun a chang a, chutiang chuan kan chenna leh ram valh chin humhalh tur chuan mipui zingah Hnam chhan leh kan ram valh chin humhalh duhna leh tulna lo chhuak chuan vawiin thlenga kan buaina kan “RAMRI” hian Mizo fate thinlung a luah zui zel a nih hi.
He, Mizoram leh Assam Ramri chungchang hi vawi tam kan tarlang thin a, kan ramri chungchangah, Hnam Sipai thenkhat chuan Assam Chief Minister chu Mizoram ri leh a chhinchhiahna, “Boundary Pillar 46” zet a la awm thu leh kan buai fo mai hi, tha kan ti lova. Hei hi, Mizoten “War of Independence” kan neih chhan leh zalenna kan neih lehna tura thisen leh nunna tam tak luanralna leh inhlanna a nih avangin, Ex-MNA volunteer te chuan kan ngai thutak hle tih lehkha-ah chhuah tarlan tel a ni.
He ramri chungchang, Assam C.M hnena lehkha thawnah chuan, India Sorkar leh Mizo Mipui aiawh, “Provisional Gov’t of Mizoram” (Underground) kum 1966-1986-a kan inbiak tawhna ah, he kan state ramri hi sawifiah vak ngaiin kan hre lova. Kan ramri tuna kan pawm rih, 1875, British Sorkar nena Inremsiamna kan neih tawh ang khan, chiang taka ziak leh chhinchhiahna “Boundary Pillar-post-pawh 46 zet siamin vawiin thleng hian siam danglam a la ni lova, tih thu te thlen a ni tawh a ni.
Hnam Sipai Volunteer-te chuan Assam C.M. lehkha an pekah chuan, “Hetiang a nih laiin, nangni Assam sorkar lam chuan foreigner te rawn luah tirin min rawn nek reng mai bawk a. Hei tak mai hi kan ram chin humhalh a beitu, Mizo National Army-te hian engkim “Boundary Description” hi rawn tihfel/perh/Pillar siamthat kan duh a. Chutih rual chuan “Inner Line Forest Reserve” pawh hi Ramri ni lovin, kan ram chhung ngei a ni tih pawh fiah taka ziah lan, tun thlenga danglam lo a ni tih pawh min lo hriatpuia i lo pawm ve ngei pawh kan ringin kan phut tlat bawk che a ni. Tunah hian Ramri Lung (Pillar) hi nasa taka tichhiain leh khawih danglam niin kan hria a ni. He thil hi enfiaha a hmun dik taka Boundary Pillar te hi tundin leh vek, Ex-MNA Volunteer te chuan kan tum a. Hemi atan hian nang C.M ngei pawh hian nasa taka hma min lakpuia, dikna a dinchhuah theih nan min puih duh ve ngei pawh kan ring tlat a ni.
Tin, ramri bul Mizoram chhunga, ramdang mi lo inbengbel tawhte pawh lo inthiarfihlim a, lo insaseng tura hma min lak sak nghal ngei kan beisei tlat bawk che a ni. He lehkha, i hnena kan rawn thawn/pek che hi Mizo mipuite duh dan leh chanvo a nih ang ngeiin, mipuite aiawh a nih min lo pawmsak ngei pawh kan beisei e.
Tin, “Inner Line Forest Reserved” pawh kan ram/Mizoram chhung ngeia awm a nihzia chiang taka tarlan a ni. British Sorkarin Mizoram a rawn awp luih hmain, an mi leh sa ten, thingpui huan siam nan Cachar dep/ramri Territory-an rawn hmang a, kan Lusei Lal ten kan ram chin humhalhin an lo umchhuak thin a, chutiang a nih avang chuan, Ramri tihchian nan, kum 1875-ah British (India) Sorkar (Foreign) leh kan Lusei Lal, Suakpuilala te chuan Inremsiamna (Sa-ui) an tan/siam a, Inter National Ramri Lung 46 lai an phum a. Chumi Inter National Boundary chu, nemngheh nan India Sorkar Foreign Deptt. hmangin, “Governor General-in-Council chuan Notification No. 2299 Dt. 29/8/1875-a chhuaha chu chu C.M. AITCHISON-a Secretary to the Gov’t of India hminga ziah hnanin an nemnghet a ni. He Notification hi tute mahin an tidanglam thei lo. “Finfiahna chiang (Conclusive Proof) a ti a. Hemi kalha thusawi hi Sec-4-na chuan a khap tlat bawk a ni. Heng ang hian Assam C.M. hi lehkhaa hrilh hriat a niin, Dt. 15/May/2022 khan thawn chhuah vawi 2-na chu, hemi hnu-ah Assam Sorkar chuan lehkha hi an lo hmuh thu leh Central Home Ministry-a an pek/referred thu an rawn thawn tawh a, hmalak zui tum mek a niin tuna, Assam C.M lehkha kan buatsaiha tel te Pu Isaac Zoliana leh VL. Sawma ten min boralsan tawh a. An hmabak hi kan chhunzawm zel a tul ta a ni. Joint Action Comtt. Volunteer angin hma kan la tawh ang. Assam C.M lehkhathawn hming signed, tute chu, “Col Lalrawnliana, Pu Isaac Zoliana, ZD. Lalvunga, Lalremthanga, Sgt. Lalhnema te an ni. Tunah, Pu Isaac Zoliana leh VL. Sawma te an boral tawh a ni.
Note: Hming ziaktute: Col Lalrawnliana, Ex-MLA,UT. Command MNA; Pu Isaac Zoliana, Sr. Adviser MNF Founder, MNV; ZD. Lalvunga, Convener Ex-MNA Volunteer Azl.; Lalremthanga Vice President Ex-MNA Khawzawl Dist Hqrs.; Sgt. Lalhnema Ex-MNA Sub. Hqrs. Darlawn Saitual Dist.; VL. Sawma Ex-MNA Volunteer Southern Hqrs. Lunglei Dist. Lunglei Mizoram.