Kolasib district bawrhsap John LT Sanga ruahmannain Mizoram district pahnih – Kolasib leh Mamit, Assam district pathum – Cachar, Hailakandi leh Karimganj leh, Tripura-a North Tripura district-a deputy commissioner leh superintendent of police theuhte chuan Mizoram inthlanpui 2023 awm tura thawh ho dan sawiin Zirtawpni khan inbiak hmuhtheihna hmangin an inkawm.
Kolasib bawrhsap chuan state pathum chu ramri intawm, kawng hrang hranga inmamawh tawn an nih angin ramri hnaih district-a DC leh SP te’n thawh hona tha tak neiin, an thukhawm thin a, chu chuan dan leh thupek kenkawhna, ruihhlo leh a kaihhnawih do kawngah leh ei leh bar lamah hmalakna a tichakin, inpawhna leh inhriat thiamna a thlen nasa a, a tangkai hle tih a sawi. Mizorama MLA inthlan neih tur inpuahchahna kal mekah inthlan vuakveta ramria venhim kawngah a tha lo zawnga nghawng thei thil thleng tur danchah leh venah state thenawma ramri district-te thawhpuiah a sawm tih a sawi a ni.
Kolasib SP Lalrinawma Traite chuan ramri district-a SP-te chu inthlan vuakvetah dan leh thupek kenkawhnaah leh ramri kana ruihhlo leh dan phal loh thil chi hrang hrang tawlhluh tur vennaah ngawrh zawka hma la turin a ngen ve bawk a. A ni bakah hian Mamit bawrhsap VL Remliana, Mamit SP Lalthangpuii Pulamte leh Vairengte SDO (C) Lalremruata Sailo te pawhinpawimawh an tihte an sawi.
Assam-a district pathum leh Tripura-a district pakhat DC leh SP te chuan Mizorama ramri district pahnih – Kolasib leh Mamit nen thawh hona tha tak an nei chu lawmawm an tih thu leh chhawmnun zel tul an tih thu an sawi a. Mizorama MLA inthlan awm turah an theihna apiangah tanpui an inhuam tih sawiin, an sawi hona atanga bawhzui tur awmte chu bawhzui nghal an tum thu an sawi a ni.
Ramri district DC leh SP te kawm
