Assam sawrkar ruahmannaa Mizoram leh Arunachal nena an inrina ve ve, Hailakandi leh Sonitpur district-ah ramri hnaiha chengte inpawhna leh inlaichinna tha a awm theihna’na Border Festival buatsaih tura a rel bawhzuina atan Katlicherra Assembly bialtu MLA Sazum Uddin Lasker leh Kolasib district bawrhsap John LT Sanga chuan Assam-Mizoram Border Festival, Abhijit Nag Mini Stadium Manipur Katlicherra-ah an telpui a. Hailakandi district leh Kolasib district-a sawrkar official thenkhat an tel bawk.
Katlicherra bialtu MLA chuan ramria ralmuanna a awm theih nan Katlicherra-a Border Festival buatsaih ang hi Kolasib district-a buatsaih ve a tul tih sawiin, hnam ziarang inzirtawnna leh induhsaktawnna lantirna chuan inpawhna leh inunaunna tha a hrin chhuah zel a beisei thu te, tum engemawzat Mizoram a lo tlawh tawhna atangin Mizote chu hnam rinawm leh fel tak nia a hriat thu te, Kolasib district atanga Border Festival chhimtu an lo lawm thu te a sawi a ni.
Kolasib bawrhsap chuan ramri ah ralmuanna a awm theih nan sawrkarin hma a la tih sawiin, tha taka bawrhsap-te an inbiak thin thu te, ramri hnaiha huan lo ram neiten harsatna awm loin huan an enkawl chhunzawm zel nia a hriat thu te a sawi. Inbiakna mumal tak kalpui chuan harsatna sutkian kawngah inhriatthiamna, thawhhona leh inpawhna tha a hrinchhuah thin thu sawiin, Border Festival chuan ramria district pahnihte inkarah inpawhna tha zawk a siam a beisei tih a sawi a ni.
Assam -Mizoram Border Festival hi a tum khatna niin, ramria district awmte inpawhna leh inkungkaihna tha zawk siam tumna a nih bakah insumdawn tawnna leh sawrkar hnathawkte indawrtawnna hun tha siamna’na tih a ni. Hnam ziarang pholan a ni a, Hailakandi district leh Saidan Football Club ten football friendly match neiin, Assam sawrkar hnuaia department hrang hrang hmalakna phochhuakin stall siam a ni bawk.