Myanmar leh India inrina lai hung tumna awm chu sawrkar laipui hotute a sawipui hnu ah an tum zui zel lo turah a ngai tih chief minister Lalduhoma chuan a sawi a. Mizorama awm mek raltlante chu chhawmdawl zel an ni dawn tih a sawi.
Kar kaltaa Prime minister, Home minister leh External Affairs minister te hmua kal chief minister chuan Myanmar leh India inrina ah border fencing dah tumna a awm a, hei hi Mizoram chuan a pawm thei lo tih a thlen thu a sawi.
Ramri siam dawnin Mizoram hriatpui loh, barhluih ramri a ni a, Myanmar lama Zofa awmte nen engtik ni ah emaw chuan rorelna pakhat hnuaia awma Greater Mizoram din chu Mizote hmathlir a ni reng tih hrilhin, tuna India sawrkarin ‘Akhand Bharat’ (Greater India) a buaipui nen pawh kalpui dun rem tak a ni tih a hrilh thu a sawi.
Myanmar atanga raltlante chhinchhiahna, biometric identification siam tuma hma lak mekna chu a tirah an lo hrethiam lo deuh tih Lalduhoma hian a sawi a. India sawrkar hmalak tum dan zawk erawh, dan loa India rama lut, hun rei tak hnua citizenship nei zui ta te venna atan foreigner reng reng India-a lut zawng zawng biometric neih tir vek tura a tihna zawk a ni, tiin, Myanmar raltlane chauh tih tumna a ni lo tih a sawi a ni.
“Myanmar raltlanten hetianga chhinchhiah bik an nih chuan thawn haw tum an nih an hlauthawng a, Union Home minister-in anmahni thawn haw na atan kan hmang dawn loa, an ram a buai chhung chu an awm thei ang, tiin min tiam. Foreigner an nih ve miau avangin chhinchhiah erawh an ngai si a ni,” a ti.
Chutihlaiin biometric identification atana portal hman mek chu dan loa lut te chhinchhiahna a nih avangin an duh lo tih a hrilh thu a sawi a. Home minister-in Home secretary sawipui tura a tih angin a sawipui nghal a, Myanmara raltlante tan portal hran siam tumin hma lo lak a tiam tih a sawi a ni.
Raltlan chhawmdawl chu official-a kalpui theih a lo ni lo tih chief minister hian a sawi bawk. “1951 UN Refugee Convention-ah India sawrkar hi signatory a lo ni ve loa, tumah refugee angin a en thei lo. 1967 UN Protocol a awm leh a, India hian hming a ziah hnan ve lo leh a, ‘refugee’ tih hming hmanga chhawmdawlna pek kha a theih loh,” a ti. India hming sign duh loh chhan erawh an zuk hre ve vek lo thung tih a sawi.
Refugee status pe chuang si loin, a enkawlnaah chuan theihtawpa thawh ho an tum tih sawiin, “Kan hnena an khawsak a tul chhung chu duat takin kan enkawl ang. Sawrkar laipui pawhin min thlahthlam loang,” a ti.
Manipur atanga raltlante phei chu, India danpui hnuaiah raltlana sawi theih an ni lo hrim hrim tih a sawi. India khua leh tuite chu ramchhung hmun khawiah pawh inbengbel thei an ni a. An ni tan harsatna awm lo hrim hrim tih a sawi.
Myanmar atanga lokalte ai chuan Mizorama ILP hmanga rawn lut te an ngaihmawh awm zawk tih a thlen thu chief minister hian sawiin, “A bikin West Bengal leh Assam ah an lo lut reng a, sawrkarin a dal zo si loa, hengte hi Mizoramah permit neiin an rawn lut a, hei hi kan check loh chuan nakin zelah kan population balance tibuai thei an ni tih ka thlen a ni,” a ti.
Heng mite chhinchhiah nan biometric identification hman zawk a rawt thu leh, proposal siama thehlut tura an lo tih thu a sawi a. A rawtna hi a puitlin theih loh pawhin ILP system tal hi siamthat a ngai tih a thlen angin phalna an pe tih a sawi.